ZALEN March 16, 2025 : Zoram Private Drivers’ Association (ZPDA) chuan thu chhuah siamin Mizoram khua leh tui nihna neite chauh driver atan chhawr turin lirthei neitute an ngen.

Thu chhuah an siamah ZPDA chuan private driver-te thlabia inchhawrna atana lawmman an inpek thin, a hniam berah Rs 12,000/- nise tih leh daily a inchhawrna rate Rs 800/-nise tia thu an lo chhuah tawh chu mi tam takin an zawm mek nia sawiin lawmawm an ti hle tih an sawi a. Chutihrual chuan an thu chhuah ngai pawimawh lo leh zawm lo an la awm nual tih sawiin an thu chhuah hi ngai pawimawh leh zawm hram hram turin lirthei neitute, driver-te leh mipuite an inhriattir a.

Aizawl khaw chhungah hnam dang leh Mizoram khua leh tui nihna nei lo private lirthei khalh an tam leh ta hle mai a, hengho hian hlawh hniam têtêin lirthei an khalh a. Mizoram chhung ngeia cheng, Mizoram khua leh tui driver-te tan harsatna tam tak a thlen nia sawiin hetiang lirthei khalh an hmuh leh hriat reng rengah hma an la zel dawn tih an sawi a. Thuneitu lamte pawh an hma lakna kawnga thlawp tur leh thawhpui zel turin an ngen bawk.