Aizawl : Zirtawpni khan Governor P.S. Sreedharan Pillai chuan Prime Minister Narendra Modi chu a chennaah a hmu a. Mizoram tana thil pawimawh te a sawi pui a. Heng zingah hian Mizorama All India Institute of Medical Sciences (AIIMS) dinsak tura dilna pawh a tel a ni.

Prime Minister Modi leh Governor Pillai hi Mizoram tana thil pawimawh hrang hrang sawiin rei tak an inkawm a. He hunah hian Governor Pillai chuan Mizoram chhunga health sector chungchang chu ngaih pawimawh bik a tul thu a sawi. Prime minister hriatthiam theih turin Mizoram chhunga HIV/AIDS, cancer, malaria, heart attack/neuro lam kaihnawih, etc avanga Mizoram harsatna tawh mekte a sawi a. Thingtlang bakah, Aizawlah pawh natna khirh deuhte enkawl a nih theih loh thu te, sum tam tak sengin damlo tam takin phai lam an pan thin thu te, mi mal leh sawrkar sum tak tak sen ral a nih thin thu te a thlen bawk.

Governor Pillai chuan prime minister hnenah hian Mizoram sawrkar sum tam tak sen ral a ngai thin te, damloten sum tam tak senga phai an pan thinte hi tihtawp a nih theih nan AIIMS emaw, a tlukpui Mizoramah din a tul thu a hrilh a. Mizoramah AIIMS emaw, a tluk pui emaw Super Speciality Hospital din ngei turin prime minister chu a ngen nghal bawk.

Central sawrkar dawra New Delhi-a zin mek, governor hian Zirtawpni tlai khan Union Home Minister Amit Shah chu a chenna inah a kawm bawk a. Home minister hnenah hian Mizoram mamawh hrang hrangte a thlen bawk.