Aizawl: Nimin khan Rashtrapati Bhavan, New Delhi-ah Conference of Governors vawi 50-na chu President Ram Nath Kovind chuan a hawng a. Session hrang hrang neih chhungzawm nghal a ni a. Heng session zinga pakhat, Parallel Session for Breakaway Group 'A' - Tribal Issues-ah Governor P.S. Sreedharan Pillai chuan Tribal te harsatna tawh hrang hrang te sawiin Tribal te dinhmun chawikanna atan rawtna a thlen.

State Governor, Lt Governor, Union Minister leh India rama Official pawi-mawh kalkhawmte hmaah P.S. Sreedharan Pillai chuan thusawina hun a hmang a. Mizoram din-hmun te sawi hmasain Mizoram chu state pakhat chhunga mipui cheng awm zat teha Tribal awm tam na ber a ni a. Mizoram mipui 94.4% chu Scheduled Tribe (ST) an ni a ti.

“Central Sawrkar leh Mizoram sawrkar hmalaknain Tribal te hamthatna tur hrang hrang kalpui mek a nih rualin hmalakna tur tam tak a awm a ni, a ti a. Dan tlang puiin Tribal te chenna chu hmun kilkhawr zawk leh tlangram, inkalpawhna bakah inbiak pawhna te pawh a that lohna hmun te a ni tlangpui a.

Hei vang hian tribal te hian damloh thu hlaah harsatna lian tak an tawk mek a. Tribal te harsatna tawh mek te sutkian a nih theihnan Central sawr-karin ruahmanna thar a siam belh a ngai tih a sawi.

Mizoram chhunga sumchang thei thil tam tham ber chu Mau (Bamboo) a ni tih a sawi a. Mau hmanga eizawnna siam kawngah Mizoram sawrkar chuan chak takin hma a la mek a. Hemi kawngah hian Central Sawrkar puihna lian tham zawk mamawh a ni a ti a. "Mizoramin a mamawh dang pawimawh em em chu Health Care system tih changtlun a ni a. Damdawiin changtlung zawk, tunlai thiamna hmanga siam damlo enkawlna khawl changkang zawk te state mipuiin an mamawh em em laiin a la tlem hle a. Damlo enkawlna khawl changkang tam zawk Mizoramah mamawh a nih bakah inkalpawhna kawngpui tam zawk siam a la ngai a. Tun dinhmunah chuan thih leh dam kara hmanhmawh taka damdawi In pan a tul changin harsatna lian tak damlo ten an tawk mek a ni," a ti.

Parallel Session for Breakaway Group 'A' - Tribal Issues session hi Droupadi Murmu, Governor of Jharkhand in a kaihruai a. He hunah hian Arjun Munda, Minister of Tribal Affairs leh Ministry of Tribal Affairs atangin Official pawimawh te an tel a ni.