Aizawl November 4, 2022 : Ni hnih chama lo zin India President Droupadi Murmu chuan vawiin khan Eighth Mizoram Legislative Assembly Special Session ah thu sawiin, Mizoram tana harsatna lian ber chu inkalpawhna a nih thu leh hemi sutkian anih chuan zirna leh hriselna kawnga hmasawnna mai bakah mipuite eizawnna a tih awlsam dawn avangin ngaihpawimawh a ni, a ti.

Assembly Speaker Lalrinliana Sailo chuan President Droupadi Murmu chu lawmin India ram President 15-na leh Tribal zinga President hmasa ber ni tura thlan tlin ani chu a lawmpui thu a sawi a. President tanpuina leh Governor Dr Hari Babu Kambhampati kaihhruaina hnuaiah Mizoram chuan chak takin hma a sawn zel dawn a ni tih a sawi.

He hunah hian Mizoram Governor Dr Hari Babu Kambhampati chuan President chu lawmin, thlan tlin a nih hnu reilote chhunga Mizoram a lo tlawh chu lawmawm a tih thu a sawi a. Mizoram chu State muanawm tak a nih thu leh hnam hrang hrangte lungrual taka an awmna hmun a ni a, MLA-te nungchang pawh entawntlak tak a nih thu a sawi. President lo kal chuan MLA te chona thar pein an hna tha lehzuala thawk turin a puih ngei a rin thu leh a bikin hmeichhia te fuihtu tha tak a nih bakah taihmakna leh tumruhna nen chuan engkim a hlawhchhuah theih a ni tih a hriattir a beisei a. President lo kal chu lawmawm a tih thu leh nidangah pawh lo kal nawn leh turin a sawm a ni.

President Droupadi Murmu chuan Mizoram chu ram nuam tak a ni thu sawiin, President a nih hnua a vawikhatna atan a lo kal thei chu lawmawm a tih thu leh amah an lo lawm danah lawmthu a sawi. President chuan Mizoram Legislative Assembly-in kumin May-a Golden Jubilee an thleng thei chu lawmpuiin ; mipuite duh dan au chhuahpuia mipuite aiawhtu tha tak leh dan an siamna kawnga mi tam zawk hmakhua ngai thintu Member ni tawh leh ni mek te a fak. "India-in zalenna a hmuh kum 75-na hian hun kal tawh nena inzawm tlat kan nih zia a tarlang a, he hunah hian hnam pasalthate inpumpekna chuan mitin huapzo hmasawnna thlen turin mitin hnenah chona thar pe se ka duh," a ti. 

President chuan, "Mizoram leilungin engemaw chenah harsatna a thlen chungin tehna hrang hrangah hma a sawn zel. Ayushman Bharat, mitin tana health coverage chu Mizo mipuiten an chhawr takzet. Mizoram tana harsatna lian ber chu inkalpawhna a ni a, sutkian anih chuan zirna leh hriselna kawnga hmasawnna mai bakah mipuite eizawnna a tih awlsam dawn avangin ngaihpawimawh a ni. Mipuite nun ti awlsam turin hmalakna hrang hrang kalpui mek a ni a Digital India hnuaiah Mizoram chuan Central leh state sawrkar te hmalakna te chu a chhawr zel ang. Mizoram mai bakah North East state dangte hmasawnna chu ramin bung thar a kai zelna tan a pawimawh ni. Asia chhimchhak leh Asia Pacific ramte nena inpawhna tha neih anih theih nan hmarchhak State te Act East policy hnuaiah ngaihpawimawh an ni a, Mizoram hian India-in a thenawm ramte nena inpawhna tha zawk neih a tumna kawnga tha thawhtu leh chhawrtu anih ka beisei," a ti

Special Session hun khara lawmthu sawitu Chief Minister Zoramthanga chuan President-in House-ah thu a sawi avangin lawmthu a hrilh a. Tribal hmeichhia President atana thlangtu sawrkar laipui chu fakawm a tih thu a sawi bawk. Kum 1986-a remna thuthlung ziah chuan Mizoram chu India rama state ralmuang berah a siam, tiin, Mizoram chu hausa lo mahse remna leh muanna a neih chu thawnchhuah tlak khawpa ramdang te awh ber a nih thu a sawi bawk.

Assembly Special Session-a thu a sawi zawh hian President Droupadi Murmu hian chawhma dar 11:50 ah Lengpui atanga Aizawl chhuahsanin Sikkim a pan a ni.