Aizawl: Mizo National Front party chuan vawk natna chi khat African Swine Fever (ASF) chungchangah Mizoram chu India rama titha ber a ni tih an sawi.

Vawiina thuchhuah an siamah MNF party chuan India ram state dang ten mumal taka vawk suat (culling) an ti ve lo tih sawiin, "Mizoram chauh hi vawk suat compensation dawng tur kan nih avangin MNF chuan Dr.K.Beichhua hi kan chhuang tak zet a. Heta tana sum mamawh 50% hi Govt.of India-in a thawh a, chumi lo dolet nan chuan 50% chu Mizoram sawrkarin a tum a ni," an ti.

ASF chungchanga sawrkar hmalak-na tarlangin Lungsen khua, vawk thih tamna hmunpui leh a chhehvel chu ASF lenna hmunahpuan a niin Disease Investigation Team te rang taka tirh an ni a, mipui hnena ASF hrilhhriatna awareness campaign pawh vawi 209 lai neih a ni a. Vawk suatna man Rs.10,48,42,200/- pawh tihfel a ni tawh a. Official Level-ah tih tur tul zawng zawngte tihfel anih veleh District Veterinary Officer-ah pawisa hi transfer a ni ang a. District Officer-ten beneficiary account-ah an dawn tur zat theuh an deposit ang a. Rokhawlhna lian tak a awm loh chuan pawisa hi  August ni 15,2022 hmain sem vek tum a ni tih an sawi.

AH&Vety Minister Dr. K.Beichhua hmalakna tarlangin sawrkar laipuiin ran vulhtu ten an kawtkai ngeiah Veterinary service awlsam zawka an hmuhchhuah theihna turin Livestock Health and Disease Control hnuaiah State-tin tan Mobile Veterinary Unit pek tur a ni a, dan ang chuan Livestock population nuai khat zelah MVU pakhat zel a ruahman a ni. Mizoramah chuan Livestock a hniam hle a, ruahmanna ang hian pek ni ta se MVU hi 5 pawh kan dawng thei lo a, mahse Dr.K.Beichhua hmalaknain Mizoram RD Block 26 tan MVU hi phalsak a ni, an ti a. Mizorama kut hnathawktute hmakhaw ngaia vawk vulhtu te tana fing leh remhre taka hmalatu Minister chungah MNF chu a lawm hle a, state dangte tih theihloh ti theitu anih avangin kan chhuang tak meuh a ni, an ti bawk.