Mizoram himna leh Zohnahthlakte himna thuah MNF a tlanchhe ngailo- J. Sawma
![](/storage/news/post/EzqkLlKL2nq38Op2HxEphffeifnpCyp4I8B12lyn.jpg)
Aizawl May 8, 2023 : Mizo Hnamrun chhung inkhawm un hnihnaa thusawitu MNF Publicity Board Vice Chairman J. Malsawmzuala, MNF Gen. Hqrs Adviser chuan, Zoramthanga kaihhruai sawrkar chuan ram, hnam leh sakhua himna turin huaisen takin, dinna nghet tak a nei, a ti.
2023 Inthlanpuia Serchhip bial vil tura ruat J. Sawma chuan,
"Mizoram himna leh Zofate himna thuah hian MNF sawrkar hi a tlanchhe ngailo a. Congress hunlai kum 2018 March thlaa Zirlaite thlavang hauh ngam lova, kut tawrhtir ang chi kha MNF sawrkar kalphung a ni ve lo. MNF sawrkar hnuaiah chuan kum 2021 July 26-ah kan police ten silai hmetpuakin, huaisen takin kan ram himna turin sawrkarin hma a la anih kha. Zoramthanga kaihhruai sawrkar hi chuan kan ram, kan hnam leh kan sakhua himna turin huaisen takin, dinna nghet tak a nei a ni," a ti.
J. Sawma chuan, "Manipur buaina thleng mek ah, sawrkar in a tih tur dik tak a hun takah a ti zel a. Mizoram mi leh sa, Manipur-a tangkhang te sawrkarin a ngaihven reng a, a hruai haw zel dawn a ni, Zohnahthlak raltlan te tan pawh ruahmanna siamin, VC/LC te hriattirna a pe chhuak vek tawh a ni. Sawrkar-in amah maia thuthlukna siam lovin, NGO, Kohhran leh zirlai pawlte nen thawk hovin, kan mite himna turin fimkhur taka hmalak a ni. Hlawhtlinna kan hmuh mek hi sawrkar chauh nilovin, Mizo mipui zawng zawng tanrualna rah a ni. Pathianin a hun takah kohhrante a hmang a, MKHC hmalaknaa tawngtai rualna neih anih hnuah boruak sosang zual pawh a tlahniam ta rih. Kan mite hruaichhuak tur leh an himna tura sawrkar ruahmanna te kha hlawhchham thei a ni a. Hlawhtlinna lawmawm tak kan hmu ta zel hi kan hruaitute vang ni lovin, Pathianin Zofate tawngtaina a chhanna a ni tih a chiang hle," a ti.
MNF adviser chuan, MNF chu Zofate rorelna pakhat hnuaia a awm theih nana thlirtu a ni a ti a, luah chin ramte humhim zel a pawimawh leh Ram neia siamtu Pathian hnenah lawmthu sawi fo a tul niin a sawi. MLA term khat pawh a liam hmaa MNF sawrkar in harsatna a tawh te chu tunhmaa la thleng ngailo, tunhnu zelah pawh a thlen leh rinawmlo khawpa nasa a ni, a ti. "Kechheh sual zeuha hnam pum tawrhna thleng thei a ni a. Chuvangin, sawrkarin fimkhur takin hma a la a, duhthusam anga hmalak theihloh tamtak a awm. Theihtawp a chhuah mek a, a chhuah zel dawn a ni," a ti bawk.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024