ZALEN May 28, 2025 : Indian Blind Football Federation (IBFF) buatsaih North-east Zonal Blind Football Championship vawiin-a neih zawh takah Mizo hmeichhe team chuan group match atangin hnehtu vawikhat mah tawng lovin final-ah 3-0-a Assam team lakah champion lai an nihna an humhim.

Mizo hmeichhiate an duai lo hle a, an captain Eleen Chorei hovin Sarusajai Sport Complex, Guwahati-ah an an chungnung a. He tournament-ah hian Mizoram team Captain Eleen Chorei chu top scorer & Player of the tournament a ni a, nikum lama top scorer leh Player of the Tournament a nihna pawh a humhim tel bawk a ni. A ni bakah Final match-a goal 1 khungtu Lalhriatzuali, West Serzawl pawh emerging player atana thlan a ni a, Lalhriatzuali nuta hi kumin kum tir lama National Para Judo Championship a gold medal la tu kha a ni nghe nghe a ni.

Hmeichhe team te hi national championships an qualify nghal a, national ah pawh champion leh thei ngei turin beiseina an nei sang hle. Mizoram aiawh te hi ni 29.05.2025 ah an lo haw ang.