Aizawl; Mizoram khawpui 23-ah helicopter service kalpui mek a ni a. Khawpui thenkhatah chuan passenger an tlem avangin service a mumal lo hle a, Champhai chu passenger tamna ber a ni.

Aviation thawktute hnen atanga ZALEN thudawn danin helicopter chuang tur zingah damlo leh VIP duhsak bik an ni thin tih sawiin, “A hma lama ticket lo la tawh pawh nise damlo phurh ngai an awm emaw, tul bika VIP-te an zin a ngaih chuan kan dah pawimawh thin a ni,” an ti.

Helicopter chu hmangtu an awm ve reng tih sawi bawkin, “Damlohna avanga hmangtu hi an awm ve reng a. Mizoram pawnah pawh Shillong leh Guwahati-ah a khât tawkin an kal ve reng a. State pawnah chuan heng khawpui pahnih bak hi chu kan kal meuh lo a ni,” an ti. 

Helicopter hire man hi darkar khatah Rs. nuai khat a ni a, minute 30 chhung man awm lovin a nghak thei a. Aizawl khawpui fan ‘birds eye view trip’ hi minute 15 niin Inrinniah neih thin a ni a, puitling tan Rs. 2,000 niin naupang kum 10 hnuai lam tan Rs. 1,000 a ni a. Mizoram khawpui dangte chu an hlat dan azirin a chuan man hi a inang lo hlawm.