Aizawl: Mizo National Youth Front (MNYF) hruaitute chuan CM leh finance chang mektu, Zoramthanga chu Mizoramin finance minister a neih tawha tha berah an ngai tih an sawi.

Nimin khan Aizawl Press Club-ah thuthar thehdarhtute kawmin, MNYF President L. Thangmawia, MLA chuan Congress sawrkarin leiba tam tak a hnutchhiah chung leh Covid-19 lengin nasa taka a tibuai chung pawhin chief minister leh finance changtu, Zoramthanga chuan ram sum leh pai dinhmun siam tha turin theihtawp a chhuah tih a sawi a, a hmalakna zarah Mizoram leiba pawh nasa takin a tlahniam tawh niin a sawi.

Sawrkar hmasa hunlai angin, ‘Sum lapse’, sawi thawm a awm ta lo tih sawiin L. Thangmawia chuan, financial year tawp dawn a hnawhsarum taka zan khawtairek thlenga sum tam tak hman ral tum thinna tihbo a ni ta niin a sawi bawk.

“Mizoramin sum leh paiah harsatna vawr tawp a tawh lai pawha sawrkar hnathawkte hlawh chatlak awm hauh loa a pe thei zel leh treasury khar ngai loa min hruai theite hi finance minister-in ram sum leh pai a enkawl thiamzia lantirtu a nih avangin finance enkawltu, CM Zoramthanga hi MNF thalaite chuan kan chhuang hle a ni,” a ti.

India ram leh Mizoramin Covid hripui vangin financial crisis a tawk mek tih hi phat rual a ni lo tih sawi bawkin, “He hun thim tak hi kan kalpelh theih nan Mizoram mipuiten lungrual taka ke kan pen tlan a ngai hle,” a ti a. Ram tana kan thawhpui party dangte pawh inbeih lam ringawt mena meng loin, Mizoram hmasawnna leh ram thatna tura ngaihtuahna hmang turin MNYF Headquarters chuan kan sawm,” a ti.

Thangmawia’n engnge a sawi?

MPCC unauten MNF sawrkar kum thum chhunga leiba Rs. Vbc. 12,553.08 a pung chho ta anga an tar lan hi khawi atanga data hi nei nge an nih tih kan zawt.

Kan data hmuh theih zawng zawng atang chuan tuilet hnuah Mizoram leiba hi Rs. Vbc. 12,553.08 a la tling ngai lo.

Mizoram hian India hmarchhak state zingah a pawisa fai a ni emaw, a GSDP % a ni emaw, Sikkim tih lohah leiba kan nei tlem ber.

Congress sawrkar-in GSDP % anga leiba 38.9% a hnutchhiah kha kum thum chhung MNF sawrkarin 31.2% ah a tihniam hman zawk.