ZALEN September 3, 2023 : Kumin kumtawpa Mizoram MLA inthlanpui lo awm turah thuneitu lam atanga tihchhuah chinah voters nuai 8.38 an awm a, heng zinga nuai 4.06 hi mipa niin hmeichhia nuai 4.32 an awm bawk a, vote nei zingah mipa aiin hmeichhia an tam zawk. Hetih lai hian roll revision neih mek niin October ni 4 hian final electoral roll hriat theih beisei a ni.

Tunah hian hriat theih chinah Mizorama voters awm zinga mi 3058 te hi pianphunga rualbanlo (PwD) an ni a, 5021 hi service electors, 9190 te hi kum 80 chunglam niin kum 100 chunglam 615 an awm bawk a. Kuminah hian vote nei thar (first time voters) 40934 an awm bawk a ni.

Election Commission of India tarlan danin tun dinhmunah polling station 1276 a awm a, polling station tina voters awm zat chawhrual hi 657 a ni a. Mizorama polling station awm zinga 22 hi motor in a thlen phak lohna hmuna awm an ni.