Aizawl September 6, 2022: Sports & Youth Services Department chuan August 30, 2022 a pawm tak “The Mizoram Incentive Cash Award Scheme, 2022” chungchang a puangzar a, pawisa pek thin zat pawh tihsaan tur niin, a kalphung pangai bakah 'The Mizoram State Games'-a titha te pawh pawisa pek an ni tawh dawn. Incentive Cash award hi infiammi 2005 hnenah pek chhuah tawh a ni.

He Scheme tharah hian National Level leh International Level-a medal late tana sum hmuh tur zat tur chu tihsan niin, International events-ah phei chuan ‘Participation prize’ belh a ni. India ram state dang te leh thenawm NE States tihdan te nena khaikhin hnuah rate thar hi siam a ni. Mizoram chhung bik infiamna kutpui, District hrang hrangte inelna atan Mizoram sawrkarin a ruahman, “The Mizoram State Games” pawh he dan hnuaia lawmman dawn theihna event atana belh thar a ni.

Mizo Thalai Infiammite’n sawrkar atanga hamthatna, Sum faia lawmman an dawn theihna turin, The Mizoram Sports incentive Cash Award Rules, 2001 leh hemi ennawna (Amendment) kum 2008-ah te Mizoram Sawrkar chuan a siam a. He scheme hnuaiah hian Mizo infiammi tam takin hlawkna/hamthatna an lo tel tawh a ni.

Incentive Cash award hi infiammi 2005 hnenah pek chhuah tawh niin, sum pek chhuah tawh zawng zawng hi Rs 1,36,77,600/- a ni. Incentive award rules hman lai hi kum 10 chuang hman tawh niin, event belh ngai leh sum pek tur zat bithliah te pawh a hniam deuh tawh nia a lan avangin, dan thar, “The Mizoram Incentive Cash Award Scheme, 2022” hi August ni 30, 2022-a Council of Ministers thukhawm chuan a pawm a ni.

The Mizoram Incentive Cash Award Scheme, 2022 hi khawvel huap intihsiakna leh India ram chhung intihsiakna hrang hranga Mizo thalai hlawhtlinna chang, Ram tihmingthatute tihphurna leh sawrkarin a chawimawi let na a ni a. Mizo thalai, hmabak eng tak neite tana chona petu leh fuihtu a nih beiseia siam a ni.