ZALEN August 9, 2025 : MPCC Treasurer Dr. Lalmalsawma Nghaka chuan Mipui ip atanga nuai 2300 dawn kawng siamna tur chhiah sawrkar in a lak luih tawh hnuah, tui let hnua Mizoram kawngpui chhiat ber hun kan tawng mek hi a vanduaithlak takzet a ni, a ti

Lalmalsawma Nghaka chuan vawiin khan Sihphir leh Lungdai inkar kawngpui chhia a tlawh a, tun thal chhungin he kawng hi siam thar vek ni mah se, thla 3-4 lek hnuah tlan ngaihna awm lo khawpin a chhe leh hman a ni. Kum 15 daih kawng an siam dawn tia mipui hmaa intiamtute sawrkarna hnuaiah Aizawl khawpui chhung kawng a ni emaw, khaw kar kawng, a khawi a mah hi fur khat daih an awm ta mang lo hi a vanduaithlak hle a ni a ti.

MPCC Treasurer chuan, "Sawrkar kan hrawn lai mek hian an mawhphurhna, a fawng vuantu an ni tih inhai tawh lovin, NHIDCL, BRO, leh Contractor te mawhpuh tum zel tawh lo se a duhawm hle a ni," a ti. 

"Kawngpui a chhiat avanga mipui tawrhna chu pawi a tih thu sawiin Lungdai, Serkhan, Zanlawn leh Bukpui tlangdungte'n awlsam taka an thlai tharte Aizawl Bazar-ah an hralh thin chu kawngpui chhiat avanga an thlai tharte an hralhnaah harsatna an tawk mek a, Aizawl rawn thleng turin zankhua thak thak te kal a ngai hi an lainat awm hle a ni. Zin veivak leh lirtheia eizawng ten nasa takin harsatna an tawk mek a, a bik takin damlo phurte tan phei chuan a manganthlak lehzual hle a ni," a ti bawk.

MPCC Treasurer Dr. Mala chuan, "Nikum September thla atangin mipui ip atangin kawng siamna tur chhiah (cess) tih luihna in an la a, tunah hian kawng siam nan tuialhthei chhiah a lak tling khawm chu nuai 2300 dawn a ni tawh. Chhiah nasa taka a pung chunga Mizoram history-a kawng a la chhiat ber tum kan thleng chho mek hi a inhmeh lo takzet a ni," a ti.