Aizawl May 4, 2024 : Department of Zoology, Mizoram University a Prof. H.T. Lalremsanga leh a research scholar Lalbiakzuala te thawhpui Vietnamese herpetologist Tan Van Nguyen leh German herpetologist Gernot Vogel te chuan Mizoram leh a thenawm state, ram thenawm Bangladesh, Myanmar leh Asia chhimchhak a rul chi hrang hrang te an DNA leh pianphung an zirchianna atangin Rakhine Yoma Elephant Wildlife Sanctuary atangin kawr ruam a khawsa chi Rul chi thar (new species) an hmuchhuak.

He rul hmingah hian French taxonomist ropui, Patrick David hmingchawiin Herpetoreas davidi tiin an phuah. He an rul species thar hmuhchhuah hi khawvel scientific research journal ropui, European Journal of Taxonomy volume 932 chuan ni 4 May 2024 khan a tlangzarh (published) a ni. Prof. H.T. Lalremsanga chuan, "He rul chi thar hi an chanchin hriat tur a la tlem hle a, hriat theih chinah he rul hi rul lian lo tak, feet 1 leh inches 9 atanga feet 1 leh inches 11 niin, tur neilo chi, (non-venomous) an ni a, uchang te an ei thin a, hmunhniam leh phairuam boruak hnawng cherh churh leh lum lam a khawsa chi an ni a. An biology leh an inzarpharhna chin hi chiang lehzual a zirchian a chakawm hle a ni," a ti.