ZALEN Janaury 29, 2025 : ZORO General Headquarters buatsaihin vawiin khan Free Movement Regime (FMR) hlih leh Border fencing tum duhloh lantirna Aizawl-ah neih a ni a. He hunah hian FMR hlip a, kengkawh tura India sawrkar thupek leh Mizoram sawrkar thupek hal a ni.

He huna thusawitu ZORO Vice President Rohmingthanga Kawlni chuan, “Central sawrkarin zalen taka kan unaute nena kan inkalpawh theih dan hlip a, a hlihna order a siam a, Christmas present niawm taka a rawn thawn hi keini ZORO chuan a lungchhiat thlak kan ti a, chumi rual a Mizoram sawrkarin hmanhmawh taka hman theih tura a buaipui rum rum hi ZORO chuan kan hrethiam lova kan lungawi lo hle a ni.” a ti.

ZORO General Secretary L. Ramdinliana Renthlei pawhin thu sawiin, “Free Movement Regime (FMR) thiah leh Border fencing a lo rik tirh khan Zofate chuan kan helh hle a. ZORO pawhin kan theihtawp in kan dodal a ni. NGO hrang hrang leh Political party pawhin an dodal a, Mizoram State Legislative Assembly session-ah pawh duhlohna resolution lungrual taka pass a ni. A lan danah chuan Zofa zawng zawngin kan duh lo vek a ni. Heti khawp a Zofaten kan duh lo chunga India sawrkarin a ti lui a nih chuan kan ramah eng harsatna pawh thleng se mawh kan phur dawn lo a ni. FMR hlih leh border fencing hi ZORO chuan a dodal zel dawn a, na zawk a hmala turin ruahmanna siam a ni dawn a, ZORO hmalakna thlawp zel turin mipui zawng zawng kan sawm a ni,” a ti.

Thusawitu dang Lalnunfela Chawngthu chuan, “Zofa tlang hran hrana awm te zalen takin mahni chenna theuhah kan awm thei. Nimahsela British sawrkarin min luhchhuah tak atang hian kan buai zo ta a ni. vawiinah hetiang hun hman a lo ngai ta hi a lungchhiat thlak ka ti hle a. FRM hlip a, border fencing hi kan dikna chanvo rahbehna leh chhuhsakna a ni a, kan dodal zel tur a ni,” a ti.

ZORO in Free Movement Regime hlih leh border fencing duhloh lantirnaah hian MPCC aiawhin General Secretary Joseph Lalhimpuia, MNF aiawhin TJ. Lalnuntluanga, Ex-Minister leh ZPM aiawhin PAC member Ngursailova Sailo te chuan thu an sawi a ni. Free Movement Regime (FMR) hlih leh Border fencing tum duhloh lantirna hi Champhai, Serchhip, Lunglei, Kolasib, Mimbung, Vaphai leh Tengnopal Manipur-ah te hman a ni bawk a ni.