ZALEN March 9, 2025 : Khualzin phur leh mipui hman chi lirtheite awmna chin hriat theihna tur, Vehicle Location Tracking & Emergency Alert System (VLTEAS) chu Mizorama lirthei 831-ah vuah a ni tawh a. Hetih lai hian Command & Control Centre leh ERSS (Police Department) chuan VLTEAS atang hian case lian tham leh pawi khawihna lian dawn an la nei lo.

Transport department thawktute hnen atanga ZALEN thu dawn danin Mizorama VLTEAS vuah tawhna hi ambulance pakhat, bus 56, maxi cab 81 leh taxi 81 a ni a. Heng lirtheiah hian a chuang (passenger)-ten harsatna an tawh chuan hmeh tur (button) a awm a, chu signal chu transport department enkawl, Command & Control Centre leh police enkawl, ERSS-ah lutin heta tang hian thuneitute chuan eng lirthei nge tih te, a awmna, a tlan chak zawng, a tlanna lam, lirthei neitu (registration tih laia mi) leh mobile number-te a hre thei dawn a ni.

Transport department thawktute chuan VLTEAS kaltlang hian signal eng emaw zat dawn ni tawh mah se a tam ber chu naupang ninhlei hmeh palh a ni tiin eng emaw accident tawk mi 2/1 hnen atangin an dawng tawh bawk niin an sawi a. Mahse, heng an dawnte pawh hi case lian leh pawi (serious) an ni lem lo niin an sawi bawk.

ZALEN zawhna chhangin transport department thawktute chuan mihring phur chi lirthei register tharah chuan VLTEAS hi vuah nghal ngei ngei a ngai a, hei bakah lirthei fitness tithar turte hnenah pawh vuah a ngaih avangin tun hnaiah vuah thar a tam niin an sawi a. Hetih lai hian motor dealer thenkhat chuan khawl an chah thlen har chang a awm avangin duh angin vuah zung zung a har niin an sawi bawk.

VLTEAS hi khawl tereuhte niin lirthei khalhtu leh a chuangte inkarah dah a ni a. Engmaw harsatna an tawh chuan khawla hmeh tur kha hmetin chu signal chu transport department-in darkar 24 chhung an enkawl command & control centre leh police enkawl emergency response support system-ah te signal chu lutin a tul angin an bawhzui thin a ni.

Eng nge VLTEAS

1. VLTEAS hi kum 2012-a Delhi bus pakhata hmeichhe pawngsualna rapthlak tak, ‘Nirbhaya case’ tia hriat lar thleng vanga sawrkar laipuiin lirtheia chuang, a bikin hmeichhiate himna atan a hmalakna a ni a. Ministry of Road Transport & Highway chuan October 25, 2018 khan hriattirna chhuahin state tinte chu January 1, 2019 hnu lama public transport-ah chuan he khawl hi vuah vek turin a hriattir a. Mizoramah chuan he project kalpui nan hian vaiblechhe 10.4 vel ngai tura chhuat a ni a, a senso 90% hi sawrkar laipuiin a tum a, a bak 10% hi state tum ve tur a ni.

2. Mihring phur chi lirtheiah chuan vuah vek tur tih a ni chungin two wheeler taxi leh auto rickshaw-ah te chuan vuah ngei ngei a ngai lo a ni.

3. India ramah chuan Himachal Pradesh-ah he khawl hi vuah hmasak ber niin July, 2022-ah vuah tan a ni a, Mizoramah chuan September, 2023 atangin hman tan a ni a. September 15, 2023 khan khatih laia transport minister, TJ Lalnuntluanga chuan transport directorate building-ah a hawng.