Aizawl: Nimin zing atang khan Cachar Drivers’ Union chuan Mizorama lut tur bungruate Lailapur-ah an dang a, he chanchin buatsaih lai thleng hi chuan Mizoram pan lirthei an awm rih lo.

Zalen thudawn danin Cachar Drivers’ Union hian Covid Care Center-a awm Barak Valley-a driver leh handyman te chuan tihduhdah an tuar niin an sawi a. Driver leh handyman hian enkawl an nih dan chungchangah hian an lungawi loh thu video pawh lo siam tawhin, Barak Valley Driver te hrehawm taka enkawl an nih avangin nimin atanga Mizorama bungraw phur lut reng reng chawlhtir an tum thu an sawi a, Covid Care Center Thingdawla driver leh handyman positive-te hi enkawlna tha pek an nih loh chuan Lailapur-a lungawi lohna lantir an tum thu pawh an sawi a ni.

Sethawna lirthei dingkhawma Rapid Antigen Test hmanga driver leh handyman test neih a nih tuma Covid-19 positive Non Mizo driver 33 hmuh chhuah an nih atang khan Mizorama bungraw phurh luh chungchangah Cachar driver-ten a khat tawkin Mizorama bungraw phurh luh tihtawp an tum thu an lo sawi fo tawh. Hetihlai hian Covid Care Center, Thingdawla driver leh handyman te Mizoram sawrkarin a enkawl dan an sawisel chu enfiah turin Cachar driver hruaitute hi Dr. H.Lalthlangliana, Deputy Commissioner, Kolasib chuan tun kar Nilainia kal turin a sawm a, Cachar Driver Association hi an kal lo niin thudawn a ni.

Driver leh handyman lungawi loh bul tanna ber hi Vairengte Screening Point-a Covid-19 test-na awm hi niin thudawn a ni a, screening point-a RAT kalpui a nih hnuah Non Mizo driver leh handyman zingah positive hmuh chhuah 125 an awm tawh a. DC Kolasib chuan positive-te hi Sezawl chhuah leh tawp chi an ni tawh lo niin a sawi a. DC Kolasib chuan hnam dang driver leh handyman-te hi a thlawn vek a enkawl an nih avangin, rei tak an awm ai chuan negative zung zung a chhuah zung zung an duh thu a sawi bawk a, Mizoram mi an enkawlte pawhin pawisa an chawi vek lai a rei tak lo enkawl chu a hau tak avangin a buaithlak zawk hle niin an sawi bawk a ni.