Aizawl: Silchar-a tangkhang Mizo truck driver-te chu anmahni escort-tu Assam police-ten Lailapur khawtual mite lakah phatsana an bikbosan avangin Silchar Mizoram House-ah bawk nimin zing khan an let leh a, hetihlai hian nimin thleng khan Silchar Mizoram House-ah Mizoram mamawh bungraw phur lirthei 160 vel a tangkhang tawh.

Nimina he thil thleng chungchangah hian YMA Silchar Branch, Mizoram Oil Tanker Drivers’ Association, MSU Jt. Hqrs. Silchar leh Mizoram Indan Driver Welfare chuan nimin zing dar 9 khan Silchar Mizoram House-ah Silchar Branch YMA kaih-hruainain emergency Joint Committee an nei a, meeting chuan Mizo driver-te escort tiama an duh lo chung hruai chhuaka dinhmun hlauhawma awmtira bum chhuah an ni chu an dem thu leh Silchar Mizoram House-ah CRPF 10 tal dah belh turin Mizoram sorkar an beisei tih an sawi.

Pawl paliten thuchhuah intawm an siam a an tar lan danin, October 30, 2020 zan dar 11 velah Assam police SI leh constable 2 te Mizoram House-a driver tangkhangte riahnaah kalin, zing dar 1:45-ah escort-a Mizoram lam an kal theih tur thu leh escort an pek dawn thu an sawi.

Mizo driver-te hian an kal loh chuan Assam sorkarin escort kan pe a, an kal duh lo an tih hlauhthawn avangin lungsi zan lovin an zui niin tar lan a ni.

Silchar Mizoram House DRC Saizikpuii chuan Mizoram House-a duty lai, Zothanpuia Pachuau, Mizoram Security Police Unit leh CRPF 3 te a kal teltir a, Sonabarighat thleng Assam police SI pakhat leh constable 2 te chuan hruaiin, chuta tang chuan Scorpio varin police paliten Kabuganj thleng hruaiin, an area a ni tawh lo tiin, a bak an hruai duh tawh lo a. A bak chu Dholai police te anmahnia dawr mai turin an tih thu ziah lan a ni.

Mizo driver-ten Dholai police outpost an thlenin police duty-te an kai tho chawp a, police constable 3, silai keng loten private motor Alto varin Lailapur thleng an escort ve leh a, Lailapur police check gate-ah Assam police-te chu hmuh zui tur awm loin an relh ru vek.

Lailapur-ah hian Mizo driver thleng hmasate lirthei chu mipuiin hual nghalin an pung chak hle a, hmanraw hrang hrang chem, thingfak leh lungte kengin an lo in ringlawk hle tih a hriat theih a. Zothanpuia Pachuau, Mizoram police security unit leh CRPF 3-ten theihtawp chhuahin buaina chhuak tur an dang thei hram hram a, boruak tha lo zawk a thlen hlauhthawn thilah Silchar Mizoram House lamah nimin zing khan an let pui leh ta vek a ni.

Ramri buai avangin nimin tlai theng khan Silchar Mizoram House-ah Mizoram mamawh bungraw phur, Mizo driver-te khalh lirthei 16 leh hnam dang driver-te khalh 114 vel thangkhang a awm tawh.

ZALEN thudawn danin, Mizo driver te hi Silchar Branch YMA ten an ei leh in tur buaipui sakin, MSU Silchar ten dal bag an pe tawh a, Bagha Truck driver assn. te pawhin dal leh pawisa pein an tanpui tawh bawk. Mizo driver-te hi Silchar Mizoram House-ah riahtir an ni a, an riahna man chawitir an ni dawn lo nia thudawn a ni.

Silchar Branch YMA hruaitute sawi danin, Silchar lamah chuan engmah thawm a awm lo a, a then phei chuan ramri ah buaina a awm tih an hre miah lo emaw tih turin boruak a ralmuang.