Aizawl August 15, 2024 : Tukin zing khan Home Minister K. Sapdanga chuan Mara Autonomous District Council Office a tlawh a, Chief Executive Member (CEM) M. Laikaw leh a thawhpui ten an lo dawngsawng a, CEM hian Home minister hi Mizoram Minister zinga MADC Office tlawhtu awmchhun a nih thu a lo hrilh.

CEM Conference Hall-ah Elected Office Holder te leh MADC a Head of Department te nen inkawmhona an nei nghal a, CEM chuan Mizoram Minister zinga MADC Office tlawhtu awmchhun a la nih thu sawiin lawmthu a sawi a, Home Minister hnenah hian Siaha District in an mamawhte a thlen

M. Laikaw hian District Council Court-ah Police ASI leh Constable a ngheta dahsak tur leh Siaha District chhunga Police indaih lohna enpui tur leh District Jail Building leh Chapel te bakah Staff Quarter te sakthat sak bakah Police Quarter hlui tawh te chu sak that sak turin a ngen.

Siaha District chhunga Urban Development & Poverty Alleviation (UD&PA) Department te MADC kuta hlan turin ngenna a siam bawk.

K. Chhuabei, Executive Member pawhin Siaha District mipui ten an hman ber District Playground, Siaha Vaihpi Field chu mipui intawhkhawmna tura hman tlak a nih theih nan hmalak sak turin ngenna a siam ve bawk.

K. Sapadanga chuan, a theih ang anga lo enpui a tum thu a sawi a. Home Minister hi Siaha-a India Independence Day hmanna turah khuallian a ni a, zingkarah MADC Office hi tlawhin Mizoram sawrkar hnuaia Official ten an tawiawm a ni.