ZALEN July 18, 2025: July 10, 2025 zan khan Zokhawthar Police Station te chuan an thu dawn bawhzuiin Zokhawthar chhehvelah foot patrolling an nei a. Dar 8:00 PM velah satha ip hring, ruihhlo dahna ni ngeia hriat chu Kudamsen Kai, Zokhawtharah an chhar a. A hnu lawk hian a bulhnaiah mi pakhat -Lalnuntluanga (20) s/o Lalpekliana, Khawmawi Village, Myanmar, Kudamsen, Zokhawthar a cheng mek nia inchhal chu man niin, satha ip hi Khawmawi, Myanmar atanga a ken leh helai hmuna a dah ngei a nih thu a inpuang a ni.

Heroin hi a belhkhawmin Kg 7.422 niin, Rs. 2,22,66,000 hu nia chhut a ni. Mi man inpuanna atangin rang taka chhui chhunzawm a ni a, he thila inhnamhnawih midang pathum chu man belh leh an ni.

- Lalhriatliana (28), s/o Malsawma, Tahan ‘C’ Group, Zokhawthar a cheng mek.

- Chunglianawia (37), s/o (L) Funglinga, Khampat, Myanmar, Zokhawthar a cheng mek.

- Tialvangi (44), d/o Khuahluma, Neuva Section, Zokhawthar.

Hemi hnu hian an inpuanna atangin leh CID(SB) te puihnain Keifang, Saitual District-ah midang pakhat H.Lalrinsanga(49) s/o Lalremmawia(L) Aizawl Venglai nia inchhal chu man belh leh a ni bawk.

Tun tuma Champhai Police te Heroin man hi Mizoram Police-in tum khata Heroin fir tha chi a man zinga tam ber, fir ber leh hlutna sang ber nia hriat a ni.

#ZalenNews