12.4.2022; Mizoram police te chuan tun hnai thla 2, March leh April chhung hian Mizoram hmun hrang hrangah, international market rate a chhut ruihhlo cheng nuai sang 3 chuang hu an man tawh a, heng ruihhlo neitu a puh mi 10 man an nei bawk. 

Mizoram police chhinchhiah danin, 4.4.2022 khan Special Narcotics PS (CID Crime) team te chuan methamphetamine mum 1,00,000, Kg 9.602 a rit, international market-a cheng nuai 3000 (vbc.30) man hu chu Vaivakawn, Zohnuai, Sairang road-ah Tuanremi (46), Farkawn, Champhai District, Bawngkawn Hmar Veng-a cheng mek kut atangin an man a, hei hi tunhnai thla 2 chhunga ruihhlo an man len ber a ni.  

Hmun hrang hrang a Mizoram police ten ruihhlo an man te hi methamphetamine leh heroin a ni deuh ber a, ganja man pawh engemawzah an nei bawk. Police te hian ruihhlo kengtu, a neitu a puh man an nei nghal deuh zel a ni.

Ruihhlo bakah Special Narcotics PS team leh BSF Sector Aizawl tangkawp te chuan pawisa lem, Rs.11,35,600/- man hu, (Rs. 500 tlang -1368, Rs.200 tlang - 1507 leh Rs.100 tlang - 1502) chu Lalmuankimi (48), Mualpui Salem Veng mi kut atangin Aizawl Dintharah an man bawk.

Thalaite nun tibuaitu ruihhlo dona kawnga tanrualpui turin Mizoram police chuan mitin a sawm tak meuh a ni.