ZALEN March 19, 2025 : Ex MNA te buatsaih Lunglei Kawmzawl Ambush hlawhtlinna hriatrengna monument hawn chu Pukpui-ah MNF President Zoramthanga chuan a nei a, he hunah hian Assam nena inkah tum khan Mizoram police te withdraw ai chuan ban a huam zawk thu a sawi.

Zoramthanga chuan, "MNF movement, Hnam thinlung putna leh Mizoram tan a theih tawp kan chhuahah khan Burma a kan unaute, Manipur leh East Pakistan, Assam leh Shillong-a Zofa zawng zawngte khan an tuar vek a, chu chuan Hnam anga chimral kan nih lohna pawh hi a ni. India Hmarchhak hi han en ila, Shillong, Manipur a dawrkai lian zawng zawng hi vai dawr a ni. Mizoram erawh a ni lo, heng zawng zawng hi Pathian Mizo mipuiten a man tam tak an pek vang a ni."

"Thangtharten an hriat reng tur chu hei leh chen hi Lalpan min awmpui a, Jehova hian Hnam tam tak hnena chanchintha hril turin Mizo Hnam hi a humhim a, MNF hi a ral mai mai dawn lo, thawhchhuah leh ni a nei dawn. Thisen tam tak chhuak a, Hnam thuthlung kan lo tihnghetna hi Pathianin min hriatpui a, malsawmna in min la vur leh dawn a ni tih hi hriat a, an ngaihtuah a, an chhiar ve a ngai. Vawiina kan hawn tak Monument hian Hnam Pasalthate tumruhna, taimakna, huaisenna, Hnam thinlung an putna, vai sipaite laka ram tana hnehna an chan dan min hriat thar tirtu lo ni se," a ti

Chief Minister hlui chuan, "Sawrkarna kan chelh lai a, Assam nen ramria kan sipaite an inkah tum khan, Union Home Minister Amit Shah chuan ramri a kan sipai awmte lalet turin thinrim takin min rawn bia a. Ka chhanna chu, ka sipaite ka withdraw-na in hmuhin ka banna in hmuh hmasak ka ring tiin ka chhang a ni," tiin Assam nena inkah tuma Union Home minister a chhan thu a sawi bawk.

Monument hawnna inkhawm tawi Pukpui khawchhung a neih hi Vanlalhmuaka, President Ex MNA Southern Hqrs Lunglei chuan a kai hruai a. LMC Ward no I councillor Nl.Lalhruaitluangi Executive Councillor leh C.Zama, President EX MNA General Headquarters Aizawl te chuan an tel pui bawk.