Aizawl: Zo Legislature Party hruaitu Lalduhoma, MLA chuan, "Mizoram politics ah insiamthatna (reformation) a thleng mek a ni," a ti.

Nimin Sumsuih khuaa ZPM VC thar lawmna leh mithar lawmluh inkhawm ah thu sawiin Lalduhoma chuan,"MLA atanga min ban tir tumna chungchangah mi tam takin lungawilohna lantir a, buaina a chhuah hlau te an lo awm a. Hei hi kalphung thar zia a ni lova, politics a Pathian ram thlentir tum kan nih avangin Pathian hnenah tawngtai rualin hun kan hmang ta zawk a. ZPM thalai rual te leh ZPM Hqrs. OB rual ten, kan inah tawngtai rualna rawn neiin, Pathian kutah min hlan a, an chungah ka lawm hle a. Thil thalo ni a kan ngaih, rilru natna min thlentute hi Mizoram politics siamthatna hmanrua a lo ni daih thei a. Keinin vanduainaa kan ruat hi, a hmangaihna lantirtu a lo ni ta zawk a ni," a ti.

Lalduhoma chuan, "Zoram thalaite tunah chuan an harhchhuak mek a, kan hun tawng mek avang hian Mizoram politics siamthat duh an pung zel a, kalphung tha, a ngaihna hria leh hnathawk thei sawrkar siam duhna leh tumna tunhnai mai atang hian a nasa ta hle a, hmun hrang hrangah ZPM zawmthar lawmluh tur an awm ta reng a, hrileng avangin bawhzui a harsa ta zawk hial a ni," a ti bawk.