Aizawl August 16, 2022 : ZPM chuan vawiin khan Vana Pa Hall-ah 'Sustainable Development & Reform Policy (SDRP)' bu an tlangzarh a, President Lalliansawta chuan SDRP tlangzarhna hun hi a hmang a, an policy ziahna lehkhabu-ah hian ZPM ruangam a lan thu a sawi. ZPM Leader Lalduhoma pawhin, Mizoram politics hi Pathian mite luhchilh tlak lova kan ngai a nih chuan a dik lo ang, a ti bawk.

Lalliansawta chuan, "Nakkumah inthlanpui kan hmabak a, kan tlin ngei theih nan engnge kan tih ang. Sum sem tur kan nei lo a, kan duh hek lo; nihna emaw, hna emaw insawihmuh kan tum hek lo, amaherawh chu ZPM auhla pawimawh tak chu mitinte hi mahni leh mahni intanpui thei tura siam a ni. A mawm a awm lo a, thlantuia awm a ni. A huphurhawm a, a rit zawnga lak chuan party danga pem nawl nawlna tling a ni. Mizoram, ram nuam tak hi tun ang renga kan kal chuan smuggler paradise a chang mai ang, mihring rilru duham, chin tawk awm lo hian a welcome zel ang tih a rinawm tlat. Kuhva ringawt pawh kan buaipui rei tawh dan enin chu chu a hlauhawm a ni. Rinawmna leh taimakna nen, kan tu leh fate tan mipui sawrkar, kalphung thar tungding ila, chu thawhrimna tel lo chuan Zoram her luai luai tawh hi kan tungding zo lo ang tih a hlauhawm a ni. Chutiang tur chuan ZPM-a ka thawhpuite leh Zoram mipuite ka sawm a che u; kan thlantui i ui lo ang u," a ti.

ZPM Leader Lalduhoma chuan, "Kan policy kha a bu-ah chuan a zawng zawng a tih theih loh a, a bu chhah zawk a la awm a ni; chung zawng zawng innghahna chu Mizoram rorelnaah Pathian ram lo thleng rawh se tih hi a ni. Hei hi ZPM lungphum, kan policy innghahna a ni. Sam ziaka kan hmuh angin, leilung leh a chhunga thil awm zawng zawng hi Pathian ta a ni. Pathianin leilungah lalram din a duh a, chu mawhphurhna chu mihringte kutah a nghat a ni. Genesis atanga Thupuan kan en chuan, he leia kan hman tur deuh vek a ni. Nazareth Manifesto leh Lal Tawngtaina kan khaikhawm chuan, Pathian duhzawng tih a ni mai. Tunah, hetah, kan ramah ngei hian Pathian ram thlentir turin min zirtir a ni," a ti. 

Mizoram sawrkar inrelbawlna leh sum enkawl dan chungchang sawiin, "Kan awmdan leh kan dinhmun enin hei hi Pathian mite tihdan tur a ni lo. Pathian thu angin mihringten kawng tinrengah thil pahnih chiah thlan tur kan nei a, chu chu malsawmna leh anchhia a ni. Khawi kawng nge kan zawh tih hi chhut ngun a tul. Rorelna dik hi inthawina aiin Pathianin a duh zawk," a ti a, "Mizoram politics hi Pathian mite luhchilh tlak lo a kan ngai a nih chuan a dik lo ang. Setana ta nia kan hriat chuan a chhungah kan zuang lut ang a, Pathian rama chantir turin kan bei tur a ni dawn lawm ni? Kan ramin teh dik tur a neih lai hian, kan neutral ngawt thei lo ang. Rorelna thleng phak harhna kan mamawh a, chutah chuan politician-te hi kan mawhphurhna a sang hle, kan nun pawh i uluk ang u. Pathian duhdana ram rorelna kalpui hi ZPM-in kan tum ber a ni a, ZPM hian beiseina thar nen kan thlir a ni," a ti bawk.

SDRP tlangzarh inkhawm hi K Sapdanga, Working President-in a kaihruai a; Rev R Lalrintluanga, Executive Secretary, BCM-in hunserh hmangin, Dr. KC Lalmalsawmzauva, General Secretary i/c Policy & Research chuan policy chungchang sawizauna hun a hmang bawk a ni.