August 2, 2022; Mizoram Pollution Control Board (MPCB) chairman thar atan tunhnai khan Rosiama Vanchhong, Indian Forest Service/IFS (Rtd) ruat (appoint) a ni a, ruat a nihna notification chu July ni 22, 2022 khan, Mizoram sawrkar a Principal Secretary, Environment, Forests & Climate Change (EF&CC) changtu, Jitendra Kumar chuan a tichhuak.

Mizoram sawrkarin MPCB chairman a ruat dan chungchang chu, nikum September ni 9 khan Assembly session ah member thenkhat ten an lo auchhuahpui tawh a, chumi hnu, September ni 23, 2021 ah MPCB Chairman R. Thanga, MJS (Rtd) chuan EF&CC Principal secretary hnenah banna a thehlut a, banna lehkhaa a tarlan danin, chairman a ruat a nihnaah thu inchuh a awm thu leh chumi vanga ban mai tha zawka a hriat vangin thutlukna a siam tih a tarlang. R. Thanga hi Mizoram sawrkar chuan August ni 3, 2021 ah MPCB chairman atan a ruat (appoint) a, August ni 9, 2021 atangin chairman a ni tan.

Hetianga MPCB chairman in banna a thehluh hnu-ah Jitendra Kumar (IFS), EF&CC chu chairman ni chhunzawmin, hun engemawchen hnu July ni 22, 2022 khan chairman atana Rosiama Vanchhong, IFS (Rtd) ruatna notication chu Mizoram sawrkar in a tichhuak a ni.

MPCB Chairman hi (period) hi kum 3 emaw, kum 65 tlin thleng thawh theih a ni.