Aizawl November 2, 2022 : Mizo National Youth Front (MNYF) chuan thuchhuah siamin, Mizoram-ah MNF sawrkar-a rinna nghattu mipui an pung chho zel a, kum 2023 Mizoram inthlanpui lo awm turah pawh Zoramthanga kaihhruai MNF-in sawrkarna ngialnghet zawk nen rorelna a chang leh dawn tih a lang chianga an ngaih thu leh lawmawm an tih thu an tarlang.

MNYF Gen. Headquarters chuan, Aizawl khawpui chhung Local Council 85-ah Local Council 76-ah MNF chuan rorelna a chang mek a. Aizawl a Local Council 85 awm atangin Congress chuan Local Council 5 leh ZPM in Local council 2 ah hnehna an chang a,  Congress leh ZPM hi Local Council pahnih ah an thawkdun bawk a ni.

MNF Thalai chuan, "Congress leh ZPM chu innghahna tlak an ni lo tih khawpui chhunga cheng mipuite'n an hriat avangin Aizawl khawpui chhungah Congress party leh ZPM dinhmun nasa takin a tlahniam mek. Aizawl khawpui chhunga MLA bial 11 awmah Congress party chuan MLA pakhat pawh an nei lo a ni," an ti. 

"Thingtlang mipuite bum tuma khawpui lama an thatzia nasa taka au puitu ZPM hian an thlawp MLA bial panga (5) chhunga Local Council 45 awm ah Local Council 1 an chang hram a. Hetihlai hian Local Council 41 zetah MNF chuan hnehna a chang a ni," an ti bawk.

MNF Thalai chuan, Hei hi ZPM dinhmun anih avangin mipuite’n ram kaihhruaina kawngah chuan rinna an nghat ngam lo tih a lang a. An Leader Pu Lalduhoma pawhin, kum 2023 inthlana an sawrkar loh chuan politics khelh a peih tawh loh tur thu a lo sawi tawh angin ZPM hian ral lam an pan meka an ngaih thu an tarlang bawk.