ZALEN Aizawl 8, 2025 : Vawiin khan PWD Conference Hall, Tuikhuahtlang-ah PWD leh YMA te Mizoram kawngpui te a lo that zawk theihna tura an thawhhona thuthlung (Memorandum of Understanding) chu kum thum (3) chhung atan an ziak thar leh. 

Thawhhona Thuthlung hi PWD aiawhin Er.H. Zoramliana, Engineer- in- Chief leh Er. C. Lalthlamuani, Chief Engineer (Planning) ten an ziak a; YMA aiawhin Central YMA President Lalhmachhuana leh Prof. Central YMA General Secretary Malsawmliana ten an ziak a ni. 

Thawhhona Thuthlung (MOU) hmasa ber hi June 14, 2018 khan ziah niin a vawihnihna chu July 14, 2022 khan ziah a ni bawk. Mizoram PWD leh CYMA thawhhona tur thuthlung tlangpui te chu:

 Hnathawh tur lian zual deuhah bul tan a nih hma in a bialtu PWD hotute ruahmanna in hnathawhna tur huamchhunga YMA Branch/ Group/ Sub-Hqrs. hruaitute nen project nihphung, hnathawh dan tur leh tul dangte

inhrilhfianna neih thin nise.

 Project intanna leh tawpna, a paltlang kawng/ khua ah te detailed information PWD in a duan angin Informatory Board, PWD senso in tar thin tur a ni a, a venhim hi YMA mawh a ni ang.

 Hnathawh laiin, hun remchangah PWD leh YMA hruaitu ten Joint Inspection an nei ho ang a, a tul dan a zirin Bialtu MLA/ Sawrkar hotu dang leh NGO dangte pawh sawm theih a ni ang.

 Hna thalo a awm chuan, YMA-in a mala hma la mai lovin, bialtu EE/SDO te nen sawiho a nih hnuah Department-in Contractor-te hi instruction pek thin

tur a ni ang.

 Kawng siam mek tikhaihlak zawnga khawsa leh harsatna siam an awmin, YMA leh Department-te inrawnin a tul angin hmalak a ni ang.

 PWD kawngpui leh side drain te a him theih na’n a tul angin Branch YMA in an huam chhungah Guideline for road safety chungchanga zirtirna an pe thin ang.

He MOU thar ziah hian August 8, 2025 atanga kum 3 chhung, August 2028 thleng a huam ang.

Thawhhona thuthlung thar hi hlawhtling taka kalpui a nih theihna’n PWD hotute leh Central YMA te’n anmahni ve veah inhrilhfiahna hun siamin Joint Monitoring Group siam a ni ang a, kum khatah tum tum 2 tal thawhhona chungchang hmalakna thlirho nise tih a ni bawk.