ZALEN February 20, 2025 : Union Minister of State for Micro, Small and Medium Enterprises; Labour & Employment, Govt of India changtu Shobha Karandlaje chuan Mizoram sawrkarin central sawrkar funds leh scheme te an bawhzui that loh avangin mipui a thleng tha tawk lo tih a sawi.

Vawiina BJP Office, Atal Bhawan-a chanchinthar lakhawmtute a kawmnaah Shobha Karandlaje chuan khawvela Health Care Scheme lian ber Ayushman Bharat PM-JAY te, PMAY (Housing For All) te, JJM (Tui Connection) te, PM Free Electrification-ah te, Toilet siamna tur atan te leh PM Scheme dang atan pawh central sawrkar chuan a hun takah sum kan pe vek thin a, heng ah te hian Mizoram sawrkar chuan PM Scheme hi tha taka Mipuiin an chhawr theih nan a hun takah apek chhuah ve zel a ngai a ni. Chutiang anih loh chuan PM Scheme kal tlanga mirethei ten hamthatna an dawn tur ang hi an dawng thei thin lova, chuvangin Mizoram mipuite hian anih tur angin kan chhawr thei dawn lo a ni a ti.

Central sawrkar chuan Mizoram hmasawnna atan Education, Health, Agriculture leh Horticulture, MSME leh hmasawnna ruhrel (Infrastructure) siamna atana central sawrkarin Mizoram tan sum tamtak a sunction a, Mipui tana hmasawnna tur central sawrkar in sum a sunction te a hman that tawk loh avangin Mizo mipui ten kawng hrang hrangin harsatna an tawk a ni a ti.

Union Minister chuan Mizoram a thlai thar chhuah dahthatna tur a tam thei ang ber siam apawimawh a, kan thlaithar chhuah dah thatna tur Cold Storage siamna tur Project te pawh central sawrkar ah a rang thei ang ber a dilna siam a pawimawh hle a, Mizoram sawrkarin chaktaka hma a lak a ngai a ni a ti.