ZALEN February 10, 2025 : BJP Mizoram chuan Delhi Legislative Assembly Election, 2025-a BJP-in hnehna a chan lawmna hun vawiin khan an nei a, he hunah hian Dr. K. Beichhua, MLA & State Core Group Member chuan Mizoram sawrkar chu fapa tlanbo dinhmun nen a inang dawn niin a sawi.

Dr K. Beichhua chuan, "Tun dinhmuna BJP hlau a, hnualsuattute chu kum lama upa tawh deuh leh tunlai thil chinchang ngaihtuah thui lutuk lo deuh te an ni tlangpui a, Congress Party-in BJP lian tur hi an hriat lawk avang leh BJP an lian a nih chuan Congress tan din chhuah leh a harsa dawn tih an hriat avangin nasa takin an lo bei lawk a, chumi rah tha lo tak chu Mizoram hian kan seng ta a ni, kan state sawrkar chu rethei leh harsa tak nimah ila, BJP thawhpui an hreh avangin sum puk tur zawngin an phi ruai a, thlatin mai sum an puk ta mai a ni," a ti.

"Mipui-a an inzawrhna an thutiam an ti hlawhtling hlei thei lova, 2025, February 20 Mizoram State Day VC/LC inthlan zawhah pawh Sawhthing kan lei ang an ti a, chhuanlam dang an siam leh dawn nge an intiam angin an lei sak dawn tih chu kan lo thlir dawn a ni. Kawngpui siamthat nan Oil man an tisang a, Fur laiin kawngsiam theih loh chhuanlam atan sum a awm vek tawh ti chung a, thal lai pawha kawngchhiat avanga harsatna kan la tawk leh mek thung si te hi a mak hle a ni. Chuvangin ZPM sawrkar kan hrawn mek hi Fapa tlanbo dinhmun nen te pawh an in ang dawn viau mai a, tunah hian min bel lovin tlan mah se, la an tlanbo naah eitur an tla chham ang a, ei tur an hmuh loh hun engtikah emaw chuan inchhir hun an la neiin, an la rawn inlamlêt ngei dawn a ni," a ti bawk.

Dr. K. Beichhua chuan, "Mizoram ah Congress Party chuan thu dik chanve pawh ni mang lo dawt hmangin BJP an beih avangin kan la hniam deuh hlek a, nimahsela chutianga Congress Party-ina min beih lai mek chuan tuna Congress Party dihmun chu kan hmuchiang hle a, tun tum Delhi-a inthlan neihah pawh Congress Party dinhmun chu Zero a ni. Mizoram ah tlem in Delhi ai chuan an tha hret a, a chhan chu; MLA pakhat an neih vang a ni. Delhi ah sawrkarna a zawna term hnih (2) AAP-in an lak hnuah India ram khawpui ber Delhi ah chuan hneh takin BJP chuan Sawrkarna kan la thei a, Mipuiin BJP ah rinna an nghat nasa hle a ni tih Result kan hmuh atang hian a lang chiang hle a ni," a ti.

"India ramah Congress Party chu a zung a nget tawh a, that chhuah leh a har viau dawn a ni. Chuvangin Mizoram ah pawh Congress Party hian awngrawp lam a pan a, tunah MLA pakhat an nei a, nimahsela nakin lawk ah erawh Mizoram ah pawh Gold Medal la phak si lovin, Silver Medal leh Bronze Medal lak hi an hna ber tur a ni tawh dawn a ni," a ti bawk.