ZALEN February 25, 2025 : Congress Party chuan tun hnaia Special Judge (Prevenvention of Corruption Act) chuan eiruk thubuaia thiamloh a chantir V. Zirsanga chu kum 4 Jail tang tur leh cheng nuai 4 chawi tura a hrem mekna chu High Court ah a khinlet avanga bail-a chhuah lailawk mek chu politics khel chhunzawm tlaka an ngaih loh thu an sawi.

Congress chuan, "Eiruk thubuai lian tak nei mek leh kan ram tichhetu hian politics hi khel chhunzawm tawh lo se, tih hi Congress Party duhdan a ni. ZPM Thalaite pawhin February ni 7, 2024-a hetiang mi eirukna laka fihlim lovin LADC kaltlanga ram rorelna hmun pawimawh a chelh chu pawi an tih thu leh ram rawngbawlna chelh chhunzawm zel tlaka an ngaih loh thu, thu thuchhuah an lo siam khum tawh nghe nghe a ni. Hetih laiin Mizoram sawrkar chuan Lai Autonomous District Council Chief Executive Member atan ruat leh hi mipui zahlohna lian tak leh eiruk chingte vulh lennaah Congress Party chuan kan ngai a ni," an ti.

"ZPM hian Pathian ram tungding turin hma kan la dawn an tiin MLA inthlan hmain mipuiah an inzuar a, a thu chu mawi viau mah se, an chet dan phung hi chuan Pathian ram tundin lam a hawi mawlh lo tih hi Congress Party ngaihdan a ni a. Hetianga an thil tih theih loh hmanga in zuar tawh lo turin Congress Party chuan ZPM Party a ngen nghal bawk a ni," an ti bawk.

Congress Party chuan, "Tun thlenga ZPM Val Upa Council ten hemi chungchanga thu chhuah an la nei lo leh a ruattu pawh an la kamkhat miah lo hi mak a ti a. CM, Minister, MLA emaw corruption a inhnamhnawih chu ban theihna kan nei ang an tih chu an power an hlihsak ta em ni, tih hi kan zawt a ni," an ti.