Aizawl: Mizoram sawrkar chuan June ni 1,2020 atanga hman tan turin petrol leh diesel a chhiah a lak thin chu tihsan a tum a, rate thar ang chuan kum khatah vaibelchhe 9.3 hmuhbelh theih beisei a ni.

Nimin Chief Minister press conference ah he thu hi sawiin Taxation Minister Lalchamliana chuan Zirtawpni a Cabinet thukhawm chuan ngun taka a ngaihtuah hnuah diesel leh petrol a chhiah lak thin chu Mizoram hun tawng mek ngaih tuahin a rate tihsan an rel tih a sawi a. Ruahman dan chuan diesel a tax (VAT) 12% lak thin chu 14.5% ah tihsan a ni a, tihian tuna litre khat Rs. 60.49 ni mek chu Rs. 62 a ni dawn a, a punna hi litre ah Rs. 1.51 a ni. Petrol a chhiah 20% lak thin chu 25% ah tihsan a ni a, tuna litre khat Rs. 66.54 ni mek chu rate tharah chuan 69.87 a ni tawh dawn a, a punna hi litre khat zelah Rs. 3.33 a ni dawn a ni.

Taxation Minister Lalchamliana chuan hmarchhak state ah chuan Arunachal Pradesh tih lohah chuan Mizoram chu diesel leh petrol man tlawmna ber a la ni dawn tho nia sawiin sawrkar chuan inthlahrunawm lutuk turah a ngai lo niin a sawi a. State dangah chuan VAT bakah surcharge te, Cess chi hrang hrang an la niin a sawi bawk . Minister chuan, "Oil man tihsan anih avang hian bungraw phur lirthei leh passenger phur lirthei te chu an phurh man tisang lo turin kan ngen a ni," a ti bawk. India ramah Covid vanga lockdown kalpui anih avangin sawr-kar sum hmuh leh central atanga dawn thin chu nasa takin a tlahniam a, Mizoram pawhin March thlaa GST atanga sum a hmuh vbc 18 chu April ah chuan vbc 14 ah a tlahniam a ni.