ZALEN Febrruary 21, 2024 : PM-Surya Ghar Muft Bijli Yojana (PM-SGMBY) hnuaiah Rooftop Solar bun te hnena Mizoram sawrkarin subsidy a pek tura tiam pawisa hlanna chu vawiin khan Kawlphetha Office, MINECO-ah neih a ni a, Power & Electricity minister F. Rodingliana chuan subsidy dawng te hlanna hi a hmanpui a, rooftop solar neih tam a pawimawh a ti.

Rooftop solar subsidy semna hmanpuitu F. Rodingliana chuan Rooftop solar hi sawrkar chuan mega watt 100 tal siam chhuah a tum tih a sawi a, Chhim leh hmar, chhak leh thlangah mega watt 10 tal siamchhuah tum a nih thu a sawi a, Chhiatna thleng avanga current pek theih loh khua te pawh nasa tak a chhawk theih a beisei thu a sawi a, Rooftop solar neih tam a pawimawh thu a sawi.

Power minister chuan sawrkarna an chan hnuah electric bill ba avanga sum chawi thin cheng crore 5 chuang an neih thin te chu tunah chuan a reh tawh a ti a, electric man ba an pek that avangin lawmman nuai 100 tel an dawng tawh zawk a ti. Sawrkar thar hnuaiah current tha lo viau anga sawi a ni chungin, kum hmasa lam aiin kum kaltaa khan darkar 700 chuangin current hi a eng tam zawk niin a sawi bawk.

Rooftop Solar hi state tam takah chuan Central sawrkar chiahin subsidy hi an pe a, Mizoram chu state anga subsidy pe hmasaber an nih thu Power minister chuan a sawi. Central hian subsidy hi watt a ziring cheng 45,000 atanga 1,65,800 thleng a pe a, Mizoram sawrkar pawh hian central subsidy pek zat dawn an pe ve bawk a, solar bun duh tan pmsuryaghar.mizoram.gov.in ah dilna theh luh theih a ni.

Mizoram-ah hian rooftop solar bun thei company hi 12 an awm mek a, a company-a zirin an rate erawh a inang lo a, 1kWp bun duh tan hian company zinga a titlawm ber chuan cheng 77,000-in an bun sak thei a, subsidy pek an nih chuan cheng 32,000-in an bun thei tihna a ni. Hetiang zat chiah watt hi company thenkhat chuan 1,00,930 ti te pawh an awm tho a, bun man hi company hrang hrang te lak dan a inang lo a ni.

Rooftop solar hi heng mizoram-a company te hian 1kWp atanga 10 kWp thleng an bun sak thei a, a watt a zir hian a bun man a inang lo a, chubakah AMC huamchhung leh an bunna tur hmun a zirin subsidy pek zat hi a inang lo thung.

Rooftop solar hian a hranpa-in battery a nei lo a, rooftop solar ten power an siamchhuah hi a neituten an hman hnua hman bang an la neih chuan grid (electric department hrui) a thawnchhuah a ni ang a, P&E lam chuan heng kawlpheta thawnchhuah zat (unit) hi a lo chhianchhiah dawn a ni. Heng unit thawnchhuah zat leh mimalin current an hmanzat chu electric bill-ah an siamrem (adjust) thin dawn a ni. Hmaral aia thawnchhuah a tamna unit hi Financial Year tawpah P&E Dept.-in Unit khatah cheng 4.82 in an leisak zel a ni.

India rama National bank ten he scheme hnuaia Rooftop Solar bunna tur atan consumer hnenah loan an pe thei a. SBI leh Mizoram Rural bank te pawhin loan hi an pe thei a, a dilna pawh hi National Portal-ah a awm bawk a ni, Kilowatt lak duh dan a zirin Cheng nuai 2 atanga nuai 6 thleng loan hi pek theih a ni a, watt duh zat a zirin loan rulhna percent a inang lo a, kum 10 thleng loan rulh chhung hi pawhsei theih a ni. Hrechiang duh tan P&E Dept.-ah zawhchian theih a ni.