June 27; 2022; Mizoram sawrkar chuan Silchar tuilian tuar, tui thianghlim tlachhamte tan tui a thawn mek a, vawiin hian Mizoram atangin tui phur tanker 7 vel chuan Silchar an luh hman beisei a ni.

ZALEN thudawn danin, vawiin hian Mizoram sawrkar ruahmanna angin, tui phur tanker 7 vel te chuan Aizawl leh hmun dang atangin Vairengte an pan a, Vairengte ah hian Aitlang pump house a tui tihfim sate chu chung tanker ah chuan thun a ni. (He thu ziahlai chawhnu dar 2:30 vel khan tanker thenkhatah thun mek a ni a. Tanker Vairengte la thleng lo, la nghah mek te pawh an la awm nia thudawn a ni)

Aitlang pump house a tuite hi tihfim sa (treatment pek tawh) vek nimahse, state danga thawn luh tur a nih avangin, fimkhur thilah laboratory lam atangin chemist lam ten an enfiah leh vek a, ruahman ang chuan Vairengte atangin a huho deuhin Silchar panpui a ni ang a, chung tui te chu Cachar DC office lamin an lo dawngsawng dawn nia hriat niin, vawiin tlai lam hian Silchar thlenpui tum a ni.

Silchar tuilian tuar, tui tlachham mekte tana Mizoram sawrkarin vawiin a tui a thawnchhuah tur hi litre sing 7 atanga sing 8 bawr vel a tling nia hriat a ni.

Nizan (June 26) lam pawh khan Mizoram sawrkar hmalakna in, PHE, Kolasib watsan division chuan Silchar tuilian tuarte tan tui litre 3,700 vel an lo thawn tawh bawk a, chung tuite chu Kolasib watsan division in lirthei an kawl ang ang, bolero pik up 2 leh 407 hmangte in Silchar phurh thlen a ni a, nizan dar 1:30 vel khan Silchar luhpui niin, tuilian vanga kal a harsat avangin, hmun remchangah an riahpui a, zing khawvar hnuah Mizoram house luhpui niin, house ah tui an lo nghei tawh a, hemi vang hian nizan lama tui phurh thlak te chu Mizoram house a hman turin ruahman a ni.