Aizawl May 8, 2023 : Vawiin khan MNF Adviser leh Minister Er. Lalrinawma chuan Lengpui Airport-ah Manipur buai avanga Mizo lo haw te a lo hmuak a, Mizoram sawrkarin tumah a thlahthlam dawn lo, a ti. He hunah hian CYMA President leh RIMS-a Mizo zirlai President ten thu an sawi bawk.

Er. Lalrinawma chuan Manipur buaina kara lo haw chu a lo lawm a. Hun harsa tak kara harsatna tam tak paltlang tawh kan Chief Minister hova ruahmanna siam a hlawhtling chu fakawm a ti a. Central YMA leh mi tlawmngaite chungah lawmthu a sawi bawk.

Social Welfare Minister chuan, "He hun khirh tak bakah tunhnaia Mizote kan tlankhawm a tul tlat thin hi mak hle mai," tiin, khawthlang lam atang leh khawchhak lam atanga raltlan lo lut ta fo mai chu Pathian remruat a nih ngei a rin thu a sawi. "Hetiang buaina karah hian Mizoram sawrkar chuan tumah a en hrang dawn lova, a thlahthlam dawn lo," a ti a. Manipur atanga hruai hawte chu duhsakna a hlan bawk a ni.

Central YMA President R. Lalngheta pawhin thu sawiin, "Kan Chief Minister a che chak em em a, hma a lo la zung zung mai a. Zan dar 11 thlengin a office-ah kan meeting hova, biak tul apiang thurawn kan pek angin a ti zung zung a. Home deptt nena kan thawhhona pawh a tha a ni," a ti.

Hruai hawte aiawhin All Mizo Medical Students Union, RIMS Manipur President Emmanuel Lalngaihmanawma, chuan lawmthu a sawi bawk a. Social media thu thang dik lo - State dang mite an haw vek tawh, tih te chu dawt a nih thu leh a rual veka Manipur an chhuahsan thu a sawi a. "Mizoram sawrkar a che chak em em a, lawmthu kan sawi tak meuh a ni," a ti.

Home deptt report danin, Mizo te hruai hawna turah Chief Minister ruahman angin kar kalta nilaini atang khan theihtawp chhuaha hmalak a ni a. Inrinni leh Chawlhni pawh chawl lovin hruaikir hna thawh a ni. Vawiina hmuahte hi mi 52 an ni a. May ni 7, 8 & 9 chhunga hruaikir tur zat chu an vaiin mi 196 an ni.