Aizawl February 3, 2024 : Printing & Stationery Minister F. Rodingliana chuan nimin khan Mizoram sikul naupang zirlaibu chhutna hmun Guwahati a mi tlawhin, sikul text bu chhut mekna printing press hrang hrangte tlawh kualin a endik a, zirlaibu chhutna hmunpui ber Guwahati daia awm Saraighat Photo Types Pvt. Ltd., Panikhaiti-ah company neitu hrang hrang te nen inkawmna an nei a ni.

Minister chuan he hunah hian Assam Press mite pawh kawmin Guwahati a tlawh chhante leh Mizoram Sawrkar hmachhawpte a hrilh a, sikul naupang zirlaibu chhut mek chu ngaih pawimawh ngai bik anih thu sawiin, zirlaibu quality tha siam a tul thu leh a hun taka zirlaibute zirlaite hnenah sem chhuah a nih theihna turin a hmun ngeiah a enfiah thu Minister hian a sawi a ni.

Minister hi Josephine Zonunsangi, Deputy Controller, Printing &Stationery Department leh Er. Vanlalmuanchhana, Principal cum Project Manager, Printing & Stationery Department bakah Dr Malsawmtluanga Fanchun, Deputy Resident Commissioner, Mizoram House Guwahati ten an tawiawm a ni.