Aizawl May 16, 2024 : Sawrkar kum liamta 2023-2024 chhung khan Mizoram State Central Library-in tlawh tu mi 6110 an nei. Mizoram State Central Library tlawh tu zingah hian zirlai an tam ber a, mi 3048 an awm a, general 2981 leh research scholar 81 te an ni. State Central Library chuan tlawhtu an pung chho niin an sawi.

State Librarian Zirsangzuali chuan tun dinhmun ah hian lehkhabu 71833 a awm a, heng lehkhabu zingah hian naupang lehkhabu 5807 a awm, hindi lehkhabu 17,427 a awm a, general 48597 a awm bawk a ti. State librarian hian thalaiin an Library an tlawh nasat thu a sawi a, naupang lehkhabu thahnem tak nei mah se, naupang lam tlawhtu an tam vaklo a ti.

Zirsangzuali chuan kum tin State Library tlawh tu hi an pun chhoh mek thu a sawi a. State Library chhunga 'IAS book corner-in' tlawhtu a ngah thu leh nilenga lehkha zir te pawh an awm thin thu a sawi tel bawk.

Mizoram State Central Library ah hian member in-register mi 9041 an awm a, puitling 7697 leh naupang 1344 te an ni.