June 14, 2022: Aijal Club-a World Blood Donor’s Day hmanna vawiina nei-ah, he hun hmanpuitu Health Minister Dr R. Lalthangliana chuan Mizoram State Health Care Scheme ba rulhna tur sum rulhpui tura an dilna chu sawrkai laipuiin a pawmpui thu a sawi.

Dr R. Lalthangliana chuan Mizoram State Health Care Scheme chu Mizoram mipui a tam thei ang berin an chhawr tangkai theih nan sawrkarin ruahmanna a siam a, amaherawhchu, budget-a ruahman lawk hauh loh khuarel chhiatna hrang hrang - hripui leng, lir nghing, vawk hri leh Myanmar raltlante tuamhlawmna thlenga sawrkar sum tam tak a luanral tak avangin sum lamah sawrkar a pachhiat phah niin a sawi a; Health Care ba tam tak a inkhawl hman phah a ti. "Health Care pawisa petu Finance Department lamin harsatna an tawk a, a rulhna turin Asian Development Bank ah soft loan cheng vaibelchhe sangkhat dil a ni a, hei hi central sawrkar rulhpui tura dil a ni," a ti

Health Minister chuan, "Sawrkar laipuiin sum lama harsatna a tawh ve bawk avangin Ministry of Finance hnuaia Department of Expenditure chuan loan hi state sawrkarin rul mai se, tih rawtna a siam a. Mizoram sawrkar hotulu ten vawi tam tak sawrkar laipui thuneitute an dawr," tiin, Thawhtan zan khan Finance Ministry Screening Committee chuan Mizoram atanga rawtna an thlen chu an pawmpui tak thu an rawn hrilh tih Dr R. Lalthangliana chuan a sawi.