Aizawl: Mizoram Pradesh Congress Committee chuan, “Mizoram sum leh pai dinhmun chhe lutuk siam thaa khaichhuak turin sum leh pai enkawlna lama mi thiam, mi hmingtha kan mamawh tak zet a ni,” an ti.

Nimin khan Aizawl Press Club ah chanchinbumite kawmin MPCC Media Chairman Dr. Lallianchhunga chuan, “Zoramthanga kaihhruai MNF sawrkar hi a tlaran zawnga a chet avangin Mizoram sum leh pai dinhmun pawh ICU-ah hial dah a lo ngai ta a, treasury khar hming pu ngam si loin sawrkar treasury-te hian pawisa pek chhuah tur an nei lo va. Heti khawpa kan sum dinhmun a chhiatna chhan chu state khat chhungkaw pa ber, chief minister-in inrenchemna awm miah lova mipui pawisa (public money) a duhsak zawngte nena inthuruala a hman teuh teuh vang a ni,” a ti. 

Congress party chuan Mizoram sum leh pai dinhmun an siam tha nia sawiin MPCC thupuangtu chuan, “Kum 2016-17 budget kha state kan nih hnua surplus budget kan neih theih tan kum a ni a. Kum 2016 June 30 hnuah RBI atanga Ways & Means Advance (WMA)-a pawisa puk ngai lo khawpin Mizoram sum dinhmun a tha chho a, MNF sawrkar hi Rs. vbch 700 chuang kan hnutchhiah thei a. Surplus budget (revenue surplus) hi a san lai ber kum 2018-2019 phei kha chuan leiba neih belh miah loin, puk belh miah loin, hma thar lakna tur kha Rs. vbch 2,500 chuang kan nei a ni,” a ti.

“Revenue surplus hi MNF sawrkar hnu kum 2019-2020 atangin a tlahniam nghal a. Kum 2020-2021-ah revenue surplus Rs. vbch 763 nei turin an intar lang (project) a; mahse, Rs. vbch 799-in an deficit leh si a. Kum 2022-2023 hian revenue surplus Rs. vbch 1,419 awm turin an chhut leh a, hei pawh hi mipui hmuha lan mawi tumna mai a ni,” a ti bawk.

MPCC chuan Mizoram sum dinhmun chungchang sawifiah turin Finance Minister an phut tih sawi bawkin, "Treasury-ten chawlhkar khat chuang pawisa an pekchhuah theih tawh loh laia Finance Minister-in engmah a la sawifiah duh lo hian a mawhphurhna a lak thutak lohzia a tilang chiang hle a ni," an ti bawk.

Zawhna chhang-in Dr Lallianchhunga chuan Mizoram sum harsatna sukiang turin hna hmanhmawh thlak ni lemlo, mahse sum tam taka tak hmanna te chu thawh hrih loh nise, tul lem lova induhsak vanga hna lak thin pawh titawpin kumtin SEDP Board 14 te tana vaibelchhe 2 hmanna pawh tihtawp ni an duh tih chan-chinthar thehdarhtu te a hrilh bawk.