Aizawl July 25, 2022 : PC Party Sr. Vice President Vanlalruata chuan Mizoram sum dinhmun a chhe tawpkhawk niin a sawi a, Mizoram sawrkarin pawisa tih tham a nei lo, a ti a, chutihrual chuan nei angin an insawi a, ba tam tak a nei bawk, tiin, Mizoram sum dinhmun chu siamtha duh leh ngam tan chuan siamthat theih niin a sawi.

Nimina PC Party hruaitute thutkhawmnaah Vanlaruata chuan, "Ka sawi thiam dan chuan Cheng khat nei chunga cheng za neia inchhal ang kan ni a, chumai bakah cheng sangkhat vel la ba zui ang kan ni. Kan chhe tawpkhawk a, tam tak chuan tun sawrkar an dem a, dem tur pawh an ni, an ti that tawk loh vang a ni. Chutihrualin kan dinhmun hi hun rei tak atanga lo inchhek khawl tawh a ni tih kan hriat a ngai," a ti.

PC Party hruaitu chuan Congress hun hmasa, J. Lalsangzuala Finance minister a nih hun lai daih atanga intawn tawh a nih thu a sawi a, khatihlaia sawrkar khan hna thar la lo turin a intiam hial a ni, a ti. Ruata chuan tlem chuan sum dinhmun pawh a that phah leh nia sawiin, MNF a sawrkar leh hnuah sawrkarin inremna chu palzutin hna thar an la leh a, kan sum dinhmun a chhiat leh phah, a ti. J. Lalsangzuala ten an siamtha vek a tihna a nih loh thu leh sawiin MNF chu a tichhe leh tu-ah a puh.

Congress a sawrkar leh hnuah pawh sum dinhmun chu a chhe zui leh tiin, 2016-a Lalsawta, Finance Minister a rawn nih leh hnuah Finance minister hian 'Mizoram Budget dik tak ka pharh,' a ti a, kan dinhmun chhiat zia a rawn langchhuak Vanlaruata chuan a ti. Kha budget a rawn pharh chiah khan insiamthatna lam a rawn hawi a, MNF sawrkar pawh hian Congress sawrkar tla ta atang khan vaibelchhe engemaw zat a rochun phah niin a sawi. 

Ruata chuan, "MNF a rawn sawrkar leh a, inrenna awm re re lovin an han kal leh a, mi dang aiin an inren lo bik ka tihna a ni lo. Tul miah lo SEDP board tih ang chi te leh tul reng reng lo siam a ni a, heng tul lo hi tihtawp a nih chuan kan sum dinhmun hi a tha leh a ni mai. Kan sum dinhmun siamthat hi a har lo lutuk a, kan Chief Minister ni lai leh Finance Minister ni bawk Zoramthanga hian a duh anih chuan kan ram sum dinhmun chhia hi a siam tha nghal thei. A ngam a nih chuan a siam tha thei reng ; a duhin a ngam phawt chuan. A siamtha lo a nih chuan, a siam tha duh lo emaw, a siamtha ngam lo tihna a ni mai. Sawrkar zel tlak lo a ni tihna a ni," a ti. 

PC Party Vice President chuan an President Lalhmangaiha Sailo chu hetiang sum dinhmun chhia siamtha tur hian a tha tawk, a ti a, Central lamah pawh sum enkawl lama rinkai a nih thu leh Mizoram budget aia tam lo enkawl tawh a nih thu a sawi a, Mizoram sum enkawl tura a tlin tawk tur thu a sawi bawk.