ZALEN July 27, 2023 : PC Party Vice President Lalrinmawii Fanai chuan thuchhuah siamin, Parliament Session neih mêk a "Forest Conservation(Amendment) Bill 2023 to North East(FCAB)" an kal tlangpui chu Mizoram tan ânchhia a ni a, Mizoram tan he bill hi pawm chi a ni lova, PC Party chuan an dodal tlat dawn a ti.

Lalrinmawii Fanai chuan, "He bill tum chu kan ram chhûng zawng zawng deuh thaw-ah hian kan ram leilung leh ramngaw-ah keimahni in thuneihna pakhat mah kan nei dawn lo tihna a kâwk a; Hei hi thil pawi tak Mizoram tan ânchhia tak meuh a ni. Heta an bill pass-a Exemption area an tih hi he bill hian automatic in Local Authority (State Government tiamin) thuneihna chu laksakin Central sawrkar kutah a pe tawp ta mai a. Mizoram hi thlai leh ramngaw leh nungcha atanga eizawng leh nung kan ni a, FCAB bill hian chû'ng kan khawsak phung te chu min khap sak vek dawn tihna a ni ta. Mau pum khat sat tur pawhin Central sawrkar phalna a ngai zel dawn ta a ni a, Kan ram tan chuan he bill hi pawm chi rual a ni lova, PC Party chuan kan dodal tlat dawn a ni," a ti.

PC Vice President chuan, "Hetianga a ram leilung fate'n kan ram leilung chungah tîk pawh kan tih theih lohna tur 'Bill ânchhia' pass a nih laiin Central sawrkarin a duhsakte tan - Zoo siam te, Eco-Tourism facility siam te, Telecommunications siam te, Mining te thlengin phalna a pe thei dawn thung  a, chu'ngte chuan Forest Conservation thil tum opposite chiahin ramngaw an tichhe leh tho dawn tihna a ni," a ti.

Rinmawii chuan, "Chu mai ni lovin, National Security chhuanlamin Army leh Defence facilities pawh Mizoram chhûng khawi hmunah pawh an siam thei ang tih a ni lehzel a. Chuvangin a ram mipui leh sawrkar in engmah sawi theih kan nei dawn lo va, a lungchhiatthlak takzet a ni. He bill a ram leilung fate tana kan ram leilung chunga mikhual chan channa tur ringawt hi chu PC Party chuan engtikawng maha pawm theih chi ah kan ngailo takzet a, he bill hian India hmarchhak state zawng zawngte hi min nghawng vek dawn avangin, a hu hova hmâ a rang thei ang bera la turin inbuatsaihna kan kalpui mek a ni," a ti bawk

He Bill hi sût emaw tih danglam emaw a nih hma loh chuan tlawmngai pawl zawng zawng te, Kohhran te, political party te leh Zoram mipui te tang ho tlat turin a ngen bawk a ni.