November 9, 2022; Aizawl khawpui chhungah taxi (4wheeler) 3,000 tling lo deuh a awm mek a, 2wheeler taxi 3,500 bawr vel a awm mek bawk. 2Wheeler taxi a tam tawh avangin taxi pangngaite sum lakluh in tunhma a pha hlei thei tawh lo a, hetihlai hian Mizoram Taxi Association (MTA) in Mizoram sawrkar hotute hnenah taxi hlui tawh a thar a thlak theih an duhna sawrkarah an thlen thin a, thu lawmawm dawn erawh an la nei lo.

MTA hruaitute hnen atanga ZALEN thudawn danin, Aizawl khawpui chhunga 2wheeler taxi a tam tawh avangte, mipui nawlpui tan hman maite a lo remchan bawk avangte in, taxi (4wheeler) ten tun hma an pha tawh meuh lo a, hemi vang hian taxi hralh a, 2wheeler taxi lei ta te pawh mi thahnemtak an awm. Taxi hlui man (resale value) pawh tun hma aiin a tlahniam mek zel bawk.

MTA hruaitute chuan taxi hlui tak tak replace theih tawh si loh thahnem tak a awm tih an sawi a, chungte chu a thar a thlak phalna sawrkarah an thlen tawh thin  a, CM, Transport minister leh minister dangte hnenah pawh an thlen tawh thin tih an sawi.

Mizoram sawrkarin taxi te hi tum khat bak renew a phal lo a, kum 10 a tlin hnuah taxi chu lirthei thar hmangin tum khat a renew theih a, chumi hnuah taxi chu a that chhung service a phalsak a, replacement ti tawh te chu motor thar hmangin an taxi renew theih a ni tawh lo thung.