ZALEN August 17, 2025: Kum liam ta, 2024-25 chhung khan Mizoram tlawhtu khualzin 5,24,784 an awm a, kum dang zawng aiin an pung. Chung zinga mi 5,911-te chu ram pawn atanga kal (foreign tourist) an ni a. Ram pawn atanga Mizoram tlawhtu zingah USA atanga kal an tam ber.

Tourism department tar lan danin 2024-25 chhunga Mizoram tlawhtu khualzin tam berte chu ram chhung atanga kal (domestic tourist) an ni a, mi 5,18,873 an tling a. December, 2024-ah khualzin an tam ber a, 59,132-te chu ram chhung atanga kal niin, ram pawn atanga kal mi 980 an awm.

Ram pawn atanga Mizoram tlawhtu khualzin zingah USA atanga kal khualzin an tam ber a, 2024-25 chhung khan mi 1,472 an awm a. Myanmar atanga khualzin kal mi 1,222 awm bawkin, Australia atanga tlawhtu mi 361 an awm bawk. Heng ram pathumte hi Mizoram tlawhtu tam zualte an ni.

Kumin kum kal mek 2025-26, April - June chhungin Mizoram tlawhtu khualzin 1,70,190 an awm leh tawh a, chung zinga 2,127 te chu rampawn a tanga Mizoram tlawhtu khualzin an ni.

Hetihlai hian Mizoram sawrkara tourism department-in a pawm ‘tour guide’ mi 89 an awm tawh a, chung mite chu khawpui bakah thingtlang hmun hrang hranga mite an ni.

Mizoram tlawhtu khualzin zat:

Kum    -Ram chhung   -Ram pawn  -Total

2018-19  -88,122   -1,644   -89,766

2019-20  -1,59,534   -2,143   -1,61,677

2020-21  -20,474   -90   -20,564

2021-22  -1,32,099   -517   -1,32,616

2022-23  -2,18,457   -3,551   -2,22,008

2023-24  -1,93,445   -3,435   -1,96,880

2024-25  -5,18,873   -5,911   -5,24,784