ZALEN : May ni 20, 2025 (Thawhlehni) chhun dar 12:00 khan Mizoram ah danglamna (transformation) a thlen theihna tura a tul anga hma la turin pawl thar, MIZORAM TRANSFORMATION MOVEMENT (MTM) chu Donum Dei Restaurant, Aizawl ah tlangzarh a ni. MTM hian “Mizoram hi ram intodelh, hmasawn leh Pathian tih ram a siam” tih hmathlir (vision) atan a nei a; thil tum (mission) pali a nei a, chungte chu:

1. Mizoram ah hmasawnna tluantling thlen

2. Chhungkaw tin hmasawnna thlen

3. Ram leh Hnam humhalh

4. Sawrkar tha a awm theihna tura hmalak

tih te a ni a. Bible chang innghahna chu Isaia 60:1 “THO LA, ENG RAWH” tih a ni.

Mizoram Transformation Movement hruaitu, Office Bearers chu heng mite hi an ni.

President : Dr. Lalbiakmawia Ngente, Bungkawn

Vice President : Laldingluaia, Sihphir

General Secretary : Dr. Vanlalsiama Chhangte, Zotlang

Asst. Gen. Secretary : Romalsawma (Roma), Mission Vengthlang

Joint Secretary : F Zothanzuala, Zotlang

Treasurer : Lalrinawmi Pachuau, Zarkawt

Ram hian hma lam pan zelin, Mizoram Vision 2050 nei chungin tun atanga kum 25 ah chuan “Ram intodelh, hmasawn leh Pathian tih ram” a lo nih theihna turin ruahmanna siamin hmalak tum a ni a. He ruahmanna (vision leh mission)-te ti hlawhtling tura theihtawp chhuah turin, Pathian rinchhanin Mizoram Transformation Movement hi din a ni ta a ni.

MTM Tlangzarhna hun hi Vice President Laldingluaia’n a kaihruai a, Rev. B Sangthanga’n hunserh a hmang. President hnen atangin MTM kalphung turte ngaihthlak a niin, Gen. Secretary in MTM chanchin tlangpui a sawi. Rev. Dr. K Lalrinthanga’n MTM Tlangzarhna neiin, Lt. Col. Lalliankunga’n Pathian hnenah malsawmna dilin hun a khar a ni.