ZALEN March 19, 2025 : Mizoram khua leh tui dik tak te tana sawrkarin health insuarance scheme thar a buatsaih Mizoram Universal HealthCare Scheme (MUHCS) chu vawiin khan Chief Minister Lalduhoma chuan a hawng a, April 1, 2025 atanga hman tan tur a ni.

MUHCS hnuaiah hian AB PM-JAY, Mizoram State Health Care Scheme leh Sawrkar MR te chu chhunfin an ni a, kalphung khat hnuaia kalpui tur a ni a, hemi hnuaia hamthatna dawn theih dan erawh danglama siam a ni thung. Civil Pensioner leh Provisional Employees te pawh pawh he sheme hnuaiah hian hamthatna siamsak an ni.

He Scheme hnuaia hian chhungkaw tin ten kum khatah Rs. nuai 5 thleng an bill thei dawn a, Rs. 2,500-in registration tih a ngai. Sawrkar hnathawkte tan a hranpa a registration tih a ngai dawn lo a, thla tin an pay level a zirin an sum thawh zat tur erawh a inang lo, sawrkar hnathawk nghet te medical bill theih zat hi chu bithliah a awm lo a ni. (PE/MR = Rs. 200 ; Pay level 1-2 = Rs. 300 ; level 3-5 = Rs 400 ; level 6-9 = Rs 700 ; level 10-12 = Rs. 1,000 leh level 13 & above = 1,500)

Civil Pensioner-ah pawh hian bill theih chin a inang lo a, thla tina sawrkar atanga pension 20,000 aia tam la te chuan Rs. 1,000 an chhunglut ang a, Rs nuai 12 thleng an bill thei ang. Pension 20,000 la tling lo te chuan Rs. 500 thla tin an chhunglut ang a, Rs. nuai 5 thleng an bill thei ang.

MUHCS te hi sawrkar damdawiin te leh empanelled hospital te-ah hman theih a ni ang a, sawrkara inziaklut lo damdawiin-ah erawh hman theih a ni dawn lo. Empanelled ni tur hian hun hawn a ni dawn a, a list awm te hi April 1, 2025 hma hian tarlan hman tura ruahmanna siam a ni.