ZALEN, Oct. 25, 2024: Mizoram UPC Tanpuitu Hmeichhe Pawl, Ladies Auxiliary Department (LAD) inkhawmpui lian chu Zirtawpni zan atang hian Ruantlangah tan niin an kohhran puipate leh general headquarters-a department/board hruaituten an hmanpui a, Pathianni zanah an tiak ang.

General LAD inkhawmpui hi Lersia Field-a pandal sakah hman a ni a, pandal hi Rephidim tia a hming vuah niin inkhawmpui tan hma zanah Ruantlang Bialtu Pastor Lalhmunsiama’n a hlan.

Inkhawmpui tan zan hian Unaunu RMS Dawngkimi, President, Genenral LAD-in inkhawm kaihruaiin Rev. T. Laldingliana, General Secretary, Mizoram UPC-in inkhawmpui a hlan a, Ruantlang bialtu pastor-in palai lawmna thu a sawi.

Inrinni hian pandal-ah rorel inkhawm awmin an pawl president-in a kaihruai ang a, rorel hlan hian Ruantlang Kohhran Biak Inah rorelnaa tel ve lote tan inkhawm a awm ang.

Inrinni zan atangin Pathianni zan thleng vantlang inkhawm a awm ang a, thuchah sawi tura ruat lawkten thuchah an sawi ang a. Pathianni chawhma inkhawmah Rev. P. Lalrinawma, General Superintendent, Mizoram UPC kaihhruaiin member thite an sun ang.