Aizawl: Zoram Medical College, Falkawna Mizoram sawrkarin Covid-19 enna khawl a bun chu a rintlak tawk tih Health Department thawktute chuan an sawi.

Tunhnaia Covid 19 an test naah ZMC khawl hian damlo nia rinhlelh te test result hi 'negative' a tih zel avangin mi tam tak rilru-ah rinhlehna a siam a, hemi chungchangah hian Zalen palai chuan Health department thawktute biain an khawl chu a rintlak tawk niin an sawi. Health department thawktute chuan, "Kan khawl hi a rintlak tawk a, Pune a National Institute of Virology tih loh ah chuan a aia rintlak hi a awm bik lo in kan hria a ni," an ti. ZMC laboratory a khawl chu a rin tlak mai bakah a thawktute pawh mithiam an ni tih sawiin, "Test naa an hotu ber hi thiamna lamah pawh Professor niin midangte pawh hi a hranpaa training nei vek an ni a. Tun dinhmunah chuan positive an hmu hrih lo a ni mai a ni," an ti.

Zalen palaiin rapid test kit a rintlak leh rintlak loh a zawhna ah test kit chu suveillance tihna atan anih thu leh natna vei leh vei loh tihchian nan chuan duhthu a sam chiah lo tih an sawi a. Test kit an hman te a that tawk leh tawk loh chungchangah chuan, "Tuna kan hman mek hi a rintlak leh tha tawkah kan ngai a, a tha lo chu ICMR in thawnlet tura a tih angin thawn let a ni," an ti. PCR test a theih vek loh em ni tih zawhna chu ICMR guidelines anga an tih thu leh khawl in a zawh tawk ang zela a theih chin china tam an test thu an sawi.

Social media a thuthang lengvelah Chennai atanga lo haw Nagaland mi 3 in Covid 19 an positive laiin Mizo positive an awm ve lo chu a rinhlehawm nia an sawi chungchangah Nagaland leh Mizoram mite hi a hrangin an haw a, Mizote hi an result pawh a tha niin Health department thawktu te chuan an sawi bawk.