ZALEN August 17, 2025: April 2024 atanga June 2025 inkar chhung khan Mizoramah HIV positive mi 2471 an awm a, heng zinga inkaina tam ber sex atanga kai 1633 awmin hei hi hri kai atanga chhutin 68.13% a tling a ni. Mizorama HIV positive zingah mawngkawhur hri kai mi 126 an awm mek.

Mizoram State AIDS Control Society thawktute sawi danin kum 1990 atanga chhinchhiah theih hnuhnung berah chuan Mizoramah HIV kai tawh mi 32,994 an awm a. Kum 2024-25 chhunga kai thar hi mi 2471 niin an zinga 1602 hi mipa an ni a, hmeichhia 869 an awm a, an zinga 140 hi raipuar an ni. April 2024 atanga June 2025 chhunga kai thar zinga 1633 (68.13%) chu sex atanga kai an ni a, 635 (29.25%) chu inchiuna hriau thianghlim lo atanga kai an ni a, nu leh pa atanga fate a kai 46 (1.83%) awmin kaina chhan hriat loh 17 (0.78%) an awm bawk a ni. 

Mizorama HIV kai/vei zingah kum 25-34 inkar an tam ber a, mi 871 awm mekin kum 35-49 inkar ten dawtin 719 hri kai an awm a, kum 14-24 inkar HIV positive 465 chhinchhiah an ni bawk a. Kum 50 chunglam hri kai 229 leh kum 14 hnuailam hri kai 47 an awm mek nia chhinchhiah a ni. Mizorama HIV positive tam ber hi thalai kum 15 atanga 49 inkar niin HIV posive atanga chhutin 88% an tling hial a ni.

Mizorama HIV vei zingah kawppui (nupui pasal nei) tam berin 950 an awm mek a, hei hi HIV positive atanga chhutin 59% a tling phak. Kawppui nei mumal lo ten dawtin mi 502 (31%) positive an awm bawk a, mawngkawhur (homosexual) 126 (8%) leh inzuar thin mi 46 (3%) HIV positive an awm mek nia chhinchhiah a ni.