Mizorama Kohhrante Inzawmkhawm Pawl (Council of Churches in Mizoram - CCM) dinna tura hma lakna kal zelah drafting committee chuan din a nih hnua danpui (constitution) tur an duang fel ta.

Kar kal ta Thawhtanni khan Baptist Church of Mizoram (BCM) Headquarters Office, Serkawn-ah drafting committee hi an convener, Rev. R. Lalnunzira kaihhruaiin an thukhawm leh a. April 3-a Synod Office, Aizawla CCM Joint Meeting-in tih tur a pekte ngaihtuahin ruahmanna hrang hrang an siam a. Council din hun leh hawn dan tur te, CCM budget ruahmanin constitution an duang fel bawk a ni.

Drafting committee-in ruahmanna an siamte hi June 11-a CCM Joint Meeting neih leh turah an thlir ho leh dawn a. Tun tum thutkhawmah hian kohhran hrang hrang aiawhte an tel a ni.

CCM Joint Meeting hnuhnung berah khan kohhran hrang hrangte chuan drafting committee-in ruahmanna a siam leh kalphung tur a duante chu an kohhran rorelna sangah an thlen thu leh CCM chu din tha an tih thu an tar lan hlawm a, hmalak la ngaite ngaihtuah turin drafting committee hi ruahmanna siam tura tih nghal a ni.

CCM-ah hian Mizoram Presbyterian Kohhran, BCM, Evangelical Church of Maraland, Lairam Isua Krista Baptist Kohhran, Evangelical Free Church of India, Isua Krista Kohhran, Bualpui (Ng) leh Salvation Army te an tel.