US-a cham mek zaithiam Sawmtea Chhangte chu Mizorama raltlan Manipur leh Myanmar unaute tan a che chhuak dawn a, Gospel Charity Concert a nei dawn a ni. He Gospel Charity Concert hi July 16, 2023 Pathianni hian Chin Baptist Mission Churh (CBMC) Maryland, USA-ah neih a ni dawn a, heta tanga an sum hmuhte hi Zo hnahthlak unaute tan hlan a ni ang. 

Mizo Society of America leh Chin Association of USA te bultuma neih a ni dawn a, Sawmtea Chhangte bakah hian zaithiam dang eng emaw zat an inlan bawk ang. Zai tur dangte hi - Joseph Suanlian, Rebecca Fanai, Sabina Fanai, Sui Par Chin te an ni a, live music nen concert hi neih tura ruahman a ni.

Sawmtea Chhangte chuan, "Hetiang hun kan hmang thei tur hi ka lawm tak zet a, Mizoramah Charity Concert neiin vawi tam tak ka pen chhuak tawh thin. USA-ah pawh mahni tan ngawta kal ni loin, midangte ka tanpui theihna awmchhun nia ka hriat leh ka duh em em kan ti hlawhtling thei tur hi ka lawm takzet a ni. 

"Kan unauten tanpui an ngai a, tlanchhe tur kan nilo. Khawihmun atang pawhin kan tihtheih ang tawk tihzel hi ka duh ber a ni. Kan thawhchhuah tam leh kan unauten ei tur leh sin tur an nei tam dawn avangin theihtawpin ka tang a ni. 
He hun atan hian Mizo mipui, zohnahthlak zawng zawngte in mi tawngtaipuina ka ngen a, Pathian leh in zarah tha taka kan tih theih kan beisei," tiin a sawi. 

Tanpuina sum lut ang angte hi CYMA kutah hlan tur niin, CYMA kut atang hian a remchan dan ang zela pek chhuah tur a ni ang.