Aizawl: Hripui leng vanga Mizoramah a thlawna thisen pek zat tlahniam mah se, tunhnaiah erawh a sang chho leh hret hret a. Nikum chhung khan Mizorama blood bank hrang hrang te chuan thisen unit 37419 an la a ni.

ZALEN in Mizoram State AIDS Control Society, Mizoram State Blood Transfusion Council thawktute hnen atanga thu a dawn danin kum kalta April 2022 atanga March 2023 inkar chhung khan Mizoram pumah thisen unit 37419 lak a niin heng zinga 34252 chu mi tlawmngaite pek (voluntary) a ni a, mi tlawmngaite pek hi thisen lak zawng zawng atanga chhutin 91.54% a tling a ni. Nikum chhung vek khan blood bank hrang hrang te hian camp tum 589 huaihawtin heng camp an neihna atanga thisen an lak zat chu unit 23508 a tling a ni.

Mizoram State AIDS Control Society thawktute chuan a thlawna thisen pe tam zingah Mizoram chu a la awm zel tih ZALEN an hrilh a. Tunhma deuha a thlawna thisen pe percentage sang tak tak ni thin kha Covid-19 hrilen vang leh inkhuahkhirhna kalpui anih avangin a tlahniam deuh a, mahse tunhnaiah a sang zawngin a kal chho leh mek niin an sawi. A thlawna thisen pek percentage hi kum 2020-21 ah 89.66%, kum 2021-22 ah 90.08% leh kum kalta ah 91.54% a tling a ni. Mizoram State AIDS Control Society thawktute chuan thisen chu mamawh dan a zira sawngbawl leh pek thin anih avangin indaih a harsa hle tih an sawi a, a thlawna thisen pe chhunzawm zel turin mipuite an sawm tih an sawi bawk.

Chhinchhiah danin Inria ram puma blood bank awm zat hi 2443 niin an zinga 1541 hi private ta a ni. Mizoramah chuan Khawzawl, Saitual leh Hnathial tih loh district khawpui dangah chuan blood bank hi a awm vek a ni.

Kum 2022-2023 chhunga thisen pek/lak dan

Blook bank                                 Lak zat    A thlawna lak     Voluntary %
Civil Hospital, Aizawl                  19226        17381                  90.4
Synod Hospital, Durtlang           3761          3189                    84.79
Dist. Hospital, Champhai            1925          1787                    92.83
Dist. Hospital, Kolasib                 1550          1454                    93.8
Civil Hospital, Lunglei                 3745          3660                    97.73
Christian Hospital, Serkawn        1134          1132                    99.82
Dist. Hospital, Serchhip               960            892                      92.92
Dist. Hospital, Lawngtlai             1309          1091                    83.35
Dist. Hospital, Siaha                    1152          1105                    95.92
Dist. Hospital, Mamit                  501            453                      90.42
Zoram Medical College              2156          2108                    97.77
Total                                           37419       34252                 91.54