Aizawl: Mizoramah Covid 19 vei tihdam an pung zel a, nimin zing thleng khan Mizorama positive hmuh tawh zat chu mi 2,103 niin tihdam tawh zat 1,759 an ni a, tunah hian enkawl mek 344 awmin Covid-19 vei tihdam zat (recovery rate) hi 83.64% a ni.

Zirtawpni zan khan Mizoramah COVID-19 positive thar 54 hmuh chhuah a ni a. ZMC RT-PCR Laboratory-a sample 454 (mipa-298, hmeichhia-156) test zingah COVID-19 positive thar 3 hmuh-chhuah a ni a. District Hospital hrang hrang TrueNAT Laboratory-a sample 121 (mipa-107, hmeichhia-14) test atangin COVID-19 positive hmuhchhuah thar 51 an awm a. Rapid Antigen Test hmanga district hrang hranga sample 533 (mipa-517, hmeichhia-16) test zingah COVID-19 positive hmuh thar an awm lo.

ZMC Laboratory-a positive hmuhchhuah te hi Bawngkawn ah mi 3 (mipa 1, kum 9 mi leh hmeichhia 2, kum 29 & 36) te an niin positive contact atanga kaichhawng an ni a, home quarantine a awm lai mek, symptom nei lo an ni.

TrueNAT Laboratory-a COVID-19 positive hmuhchhuah te hi Lunglei district-ah 33, mipa vek, kum 24-54 inkar an ni a, an zinga 26 hi BSF an ni a, mi dang 7 hi Assam Rifles an ni. Assam Rifles 7-te hi travel history nei lo, anmahni hmun Kawmzawl, Lunglei-a quarantine lai an ni. BSF positive hmuhchhuah zinga 25 hi Mizoram pawn atanga lo lut thar niin, pakhat dang hi travel history nei lo a ni a, an vaiin hian symptom nei lo vek an ni.

Mamit district-ah mipa 1, kum 23, Tripura atanga rawn haw, Quarantine Facility-a awm lai, symptom nei lo a ni a. Serchhip district-ah mipa 2, kum 19 & 20, Assam atanga lo kal, Lushai Engineers Construction Company hnuaia thawk, Quarantine Facility-a khung hran, symptom nei lo an ni.

Lawngtlai district-ah 15, mipa 14 leh hmeichhia 1 an ni a, mipa 11 hi BRO, 71RCC hnuaia hnathawk, tunhnaia Mizoram pawn atanga lo lut, quarantine lai an ni a, mipa dang 3 hi Civil Engineer niin company hnuaia thawk an ni bawk. Hmeichhia 1 hi zirlai Silchar, Assam atanga lo haw, Chawngte-a khawsa a ni. An vai hian symptom an nei rih lo.